बाहुनडाँगी । बिहिबारबाट सुरु भएको जिल्ला स्तरीय फुटबल प्रतियोगिताको दोस्रो दिन भएको खेलमा आयोजक बाहुनडाँगी युवा क्लब सेमीफाइनलमा प्रवेश गरेको छ ।
सरस्वती माविको खेल मैदानमा भएको प्रतियोगिताको शुक्रवार भएको खेलमा विर्तामोड युनाइटेडलाई २–० गोल अन्तरले हराउँदै आयोजक सेमीफाइनलको यात्रालाई तय गरेको हो ।
खेलको २ मिनेटमै गोल गर्दै अग्रता लिएको आयोजकले सहज जित निकाल्न सफल भएको थियो । खेलको दोस्रो मिनेटमा पुजन राईले गोल गरेको थिए । यसैगरी खेलको ३७ औँ मिनेटमा रोशन आचार्यले अर्काे गोल गर्दै खेललाई २–० को अन्तर बनाएका थिए । खेल अवधीभर आयोजकले खेललाई आफ्नो कब्जामा राखेको थियो । विर्तामोडले पाएको अवसरलाई सदुपयोग गर्न सकेको थिएन । खेलको म्यान अफ द म्याच विजेता टिमका रोशन आचार्य भए । उनलाई श्याम सुवेदीले प्रायोजन गरेको नगद २ हजार प्रदान गरिएको थियो ।
शनिवारको खेल मुनाल क्लब चन्द्रगढी र एपीएफ पाडाजुंगीबिच हुने प्रचारप्रसार संयोजक सागर कार्कीले बताए । प्रतियोगिताको सह आयोजकका रुपमा बाहुनडाँगी जेसीज रहेको छ ।