उर्लाबारी, १८ जेठ । मोरङको उर्लाबारी–७ स्थित नारी संकल्प बचत तथा ऋण सहकारी संस्थाद्वारा सञ्चालित १५ दिने माला बनाउने तालिम आज सम्पन्न भएको छ । उर्लाबारी नगरपालिकाको सहयोगमा सो तालिम सञ्चालन गरिएको हो ।
तालिम समापन कार्यक्रममा नगर प्रमुख खड्ग फागोले महिलाहरुको दक्षता अभिबृद्धिका लागि सिपमुलक तालिम सञ्चालन गरिएको बताउनुभयो । सिपमुलक तालिमले महिलाहरुलाई स्वरोजगार प्रदान गरी आयआर्जनमा बृद्धि गर्ने र त्यसपछि विदेश पलायन हुनबाट रोक्ने उहाँले बताउनुभयो । कम पारिश्रामिकका लागि विदेशिनु भन्दा सीप सिकेर स्वदेशमै आत्मनिर्भर बन्नु उपयुक्त हुने उल्लेख गर्दै फागोले महिलाहरुको सिप विकासका लागि नगरपालिकाले तालिम सञ्चालन गर्दैजाने बताउनुभयो ।
संस्थाकी अध्यक्ष सीता कार्कीको सभापतित्व र नगर प्रमुख खड्ग फागोको प्रमुख आतिथ्यमा सो तालिम सम्पन्न भएको थियो । तालिमका प्रशिक्षार्थीहरुलाई नगर प्रमुख फागो र वडा नं।७ का वडाध्यक्ष बीरबल थापाले प्रमाणपत्र बितरण गर्नुभएको थियो । तालिममा शोभा चेम्जोङ पालुङ्वाले सहजीकरण गर्नुभएको थियो । तालिममा २५ जना महिला प्रशिक्षार्थीहरुको सहभागिता रहेको संस्थाकी उपाध्यक्ष गोमा नेपालले जानकारी दिनुभयो ।
