देबु बानियाँ झापा
बाहुनडाँगी जेठ २० । काँकरभिट्टा फुटबल ट्रेनिङ सेन्टर झापाको मेचीनगर–४ बाहुनडाँगीमा जारी फन्दासिंह स्मृति जिल्लास्तरीय फुटबल प्रतियोगिताको सेमीफाइनलमा प्रवेश गरेको छ ।
आइतवार सम्पन्न अन्तिम क्वाटर फाइनल खेलमा दमक फुटबल क्लबलाई २–१ को गोल अन्तरले हराउँदै ट्रेनिङ सेन्टरले सेमीफाइनलको यात्रा तय गरेको हो । योसँगै सेमीफाइनलको समिकरण पुरा भएको छ ।
सोमवारको पहिलो सेमीफाइनल खेल शनिश्चरे फुटबल क्लब र मुनाल फुटबल क्लब तथा मंगलवार आयोजक बाहुनडाँगी युवा क्लब र आइतवारको विजेता ट्रेनिङ सेन्टरबिच हुने आयेजक समितिका प्रचार प्रसार संयोजक सागर कार्कीले बताए ।
ट्रेनिङ सेन्टरको जितका लागि खेलको सुरुवातीको दोस्रो मिनेटमा अजय राजवंशी र खेलको ३९ औँ मिनेटमा विकास लिम्बूले गोल गरेका थिए । दमकका तर्फबाट खेलको ५५ औँ मिनेटमा कुमार गिरीले सान्तवना गोल गरेका थिए ।
खेलको म्यान अफ द म्याच विजेता टिमका अजय राजवंशी भए । उनलाई दिपक बरालले प्रदान गरेको नगद २ हजार क्लबका अध्यक्ष पोषक दर्जी र क्लबका संस्थापक उपाध्यक्ष राजेश बुढाथोकीले प्रदान गरेका थिए । बाहुनडाँगी युवा क्लबको आयोजना तथा बाहुनडाँगी जेसीजको सह आयोजनामा भएको प्रतियोगितामा विजेता टिमले नगद ६१ हजार र उपविजेता टिमले नगद ३१ हजार प्राप्त गर्नेछन् ।
