विराटनगर । पूर्वी तराईमा तीन दिनदेखि बढेको अत्यधिक गर्मीले जनजीवन अस्तव्यस्त भएको छ ।
वायुमण्डल सफा रहँदा सूर्यको किरणले जीउ नै पोल्ने गरी बढेको तापक्रम अझै केही सातासम्म बढ्ने जलवायु तथा मौसम कार्यालयले जनाएको छ ।
वायुमण्डलीय तापक्रममा वृद्धिसँगै हावा नचल्नु र चल्दा पनि तातो हावा आउनुले सर्वसाधारणलाई घरबाहिर निस्किनसमेत समस्या उत्पन्न भएको छ । अत्यधिक गर्मीले बजार, शैक्षिक संस्था, सरकारी कामकाज समेत प्रभावित भएको छ । मजदुर र विद्यार्थीहरु गर्मीका कारण धेरै समस्यामा परेका छन् ।
बुधबार विराटनगरको तापक्रउम ३८ डिग्री सेल्सियस मापन गरिएको छ । यस्तै मंगलबा।र ३७ डिग्री सेल्सियस मापन गरिएको थियो । गर्मी बढ्दा चिसो पेयपदार्थसँगै फलफूल जुसको व्यापार बढेको छ । मध्याह्न र अपराह्न सरकारी कार्यालयसहित बजारमा सर्वसधारणको उपस्थिति पातलिएको छ । गर्मी छल्न पेयपदार्थ पिउनेसँगै सर्वसाधारणले अन्य उपाय अपनाउँदै आएका छन् । नियमित विद्युत् आपूर्ति नहुँदा बढ्दो गर्मीमा सर्वसधारण झनै पिरोलिएका छन् ।
गर्मीमा छाला ढाक्ने कपडा लगाउन, घाममा हिँड्दा नियमित अन्तरालमा बसेर शीतल पानीले हात मुख धुने जस्ता सुझाव चिकित्सकको छ । उनीहरु पानी बढी पिउने, सक्दो प्राकृतिक हावा अथवा छहारीमा बस्ने, घाममा निस्कँदा छाता लगाएर निस्किन सुझाउँछन् ।
नियमित पानी पर्दा वायुमण्डलीय तापक्रम घटाउन सहयोग गर्ने भएपनि पछिल्लो एक सातामा पानी परेको छैन । मनसुनको कतै कुनै अत्तोपत्तो छैन जसले गर्दा गर्मी बढ्ने क्रममा रहँदा सर्वसाधारण अझै बढी छटपटिएका छन् ।
गर्मीका कारण दही, चिसो पेय पदार्थ, खरबुजा, स्याउ, आइसक्रिम लगायतका सामाग्रीको विक्री भने बढेको छ । विराटनगर स्थित गुद्री बजारमा फलफुलको ब्यापार गर्दै आएका दिनेशकुमार साहले तिन चारदिन यता खरवुजाको विक्री बढेको बताउनुभयो । अन्य समयमा दैनिक ४०/५० वटा खरबुजा विक्री हुने गरेकोमा अहिले दैनिक सय वटासम्म बिक्री भइरहेको उहाँको भनाइ छ ।
विराटनगर शनिमन्दीर छेउ २२ बर्षदेखि दुग्ध विकास संस्थानको उत्पादनहरु विक्री गदै आएका यादव विष्टले दहीको बिक्री बढेको बताउनुभयो । गर्मी बढेसँगै दैनिक १० देखि १५ केजी दही बढी विक्री भइरहेको उहाँको भनाइ छ ।
सन् २०१६ अप्रिल ९ तारिखमा विराटनगरको तापक्रम ४० दशमलव ५ डिग्रिसम्म पुगेको थियो । त्यसभन्दा माथि विराटनगरको तापक्रम पुगेको रेकर्ड छैन ।
