ताप्लेजुंग । ताप्लेजुंग जिल्ला सिदिङ्मा गाउँपालिकाका पुराना कांग्रेस नेता कालीबहादुर कडरियाको शनिवार बिहान निधन भएको छ ।
विगत १ वर्षदेखि दमको रोगबाट पीडित कडरियाको निजी निवास सिदिङ्मा गाउँ पालिका वडा नम्बर १ मेहेलेमा ८८ वर्षको उमेरमा निधन भएको हो ।
पार्टीभित्र रहेर विभिन्न जिम्मेवारी बहन गरेका कडरिया तत्कालिन मेहेले गाविस वडा नम्बर ९ को नेपाली कांग्रेसका तर्फबाट निर्वाचित ३ पटक वडा अध्यक्ष समेत भएका थिए । यसैगरी उनी स्थानीय निलगिरी माविका संस्थापक सदस्य समेत हुन् ।
कडरिया पार्टीभित्र यस क्षेत्रको अभिभावकका रुपमा रहेका थिए । उनकै नेतृत्वमा यस गाविसमा हरेक क्षेत्रमा कांग्रेसले जित हाँसिल गर्दै आएको थियो । यो पटकको स्थानीय निर्वाचनमा समेत सिदिङ्मा गाउँपालिकामा समेत कांग्रेसका नरबहादुर कडरिया निर्वाचित भए । जो कालीबहादुरका भतिज हुन् । पार्टीको काममा सधैँ लगनशील र कर्तव्यनिष्ठ रहेर काम गर्ने उनले विरामी भएर हिड्न नसक्ने अवस्थामा समेत हालै भएको प्रतिनिधि सभाको निर्वाचनमा ढाकरमा बोकाएर भोट हाल्न मतदान स्थल पुगेका थिए । 
१९८७ सालमा जन्मिएका कडरियाको शनिवार नै काबेली नदीमा दाहसंस्कार गरिने भएको छ । उनको पार्थिव शरीरमा पार्टीको झण्डा ओडाएर श्रद्राञ्जली दिने तयारी भएको छ । उनका १ श्रीमतीसहित ५ छोरा र ७ छोरी छन् ।
उनका श्रीमती राधिका कडरिया, छोरा भीम, चक्र, दिपक, भानु, लक्ष्मण कडरिया हुन् ।
जेठो छोरा भीम विद्युत प्राधिकरण झापामा कार्यरत छन् भने काइलो छोरा भानु नेपाल आर्मीमा छन् । रातो कलम परिवार समेत उनलाई हार्दिक श्रद्राञ्जली व्यक्त गर्दछ । 
