३ असार २०७५
भीमराज अधिकारी, पथरी
परिवर्तनका संवाहक कार्यक्रमको हिजो विहिबार अनुगमन गरिएको छ । मोरङको लेटाङ ९ जातेँमा सञ्चालन भइरहेको २ महिने यो कार्यक्रममा लैंगिक समानता र बालमैत्री अधिकारका विषयहरुमा छलफल तथा पढाइ हुने गरेको छ । हिजो वडाका जनप्रतिनिधिहरु, विद्यालयका प्रअ, शिक्षक, सञ्चारकर्मी, सिएसडिसी प्रतिनिधि, लगाएत अभिभावक सहतको टोलीले केन्द्रको निरिक्षण तथा अनुगमन गरेको छ ।
यो कक्षा विद्यालयको भन्दा विलकुलै फरक भएका कारण व्यवहारिक ज्ञान पाएको सहभागी प्रितिका भटटराइले बताइन् । यो कक्षामा सहभागी भएपछि आफ्ना कुराहरु निर्धक्कसंग राख्न सक्ने भएको सहभागी आचल लिम्बूले बताएकी छन् । यो कक्षामा सहभागी भए पश्चात व्यवहारमा सकारात्मक परिवर्तन आएको अभिभावक देबि प्रसाद भट्टराइको भनाइ छ ।
श्री मावि जातेँका प्रअ खेमराज दुलालका अनुसार बालिकाहरुले यो कक्षा लिएपछि हरेक कुरामा अगाडी बढ्ने, आफ्ना अधिकारहरुको खोजी गरी काम गर्ने, हरेक मिटिङ, बैठकमा सहभागी हुने गरेका छन् । 
बालिकाहरु हरेक कार्यक्रममा सक्रिय हुने गरेको अभिभावक तथा शिक्षक कासीराज तिम्सिनाको भनाइ छ । वडासंगको सहकार्यमा कार्यक्रमलाई आगामी दिनमा पनि निन्तरता दिनुपर्ने र आवश्यक सहयोग वडाले गर्ने वडा अध्यक्ष कृष्ण प्रसाद लुइटेलले बताउनुभयो ।
मानव अधिकार तथा वातावरण मञ्च फरेन विराटनगरको आयोजना र प्लान नेपालको आर्थिक सहयोगमा यो कार्यक्रम सञ्चालनमा रहेको फरेन सुपरभाइजर अर्जुन बास्तोलाले जानकारी दिनुभएको छ । बैशाख १५ गते देखि सुरुभएको कार्यक्रम असार १५ गते सम्म चल्ने छ । सहभागिहरुले भने अझै समय थप गर्न माग गरेका छन् । १५ जना बालिकाहरु सहभागी रहेको कक्षा प्रत्येक शनिबार १२ देखि ३ बजे सम्म चलिरहेको छ । कक्षाको सहजीकरण स्थानिय पूजा भट्टराइले गरिरहनुभएको छ ।
