देबु बानियाँ झापा ।
‘यो संसारको कुनै चित्रकारलाई विश्व नै पोत्ने कुनै रंग चाहिए । मेरो देशका गुराँससँग सापटी माग्नु ।
तर, भो यो कुरा चाँहि पछि गरौँला । कि, मैले खाने चामलको रंग किन्न म आफुँ चाँहि अरब आएको छु ।
म मर्नु अघि मेरा बुढा भएका बुबाको हातका नङ नदुखाईकन काटन् चाहन्छु ।
म मर्नु अघि मेरी आमाले पाकाएको माली गाईको बिगौती चाख्न चाहान्छु ।
म मर्नु अघि मेरी छोरीले उसकी हजुर आमाले चुलेसीले तिखारेको पेन्सिलले ठूलो अक्षर क लेखेको हेर्न चाहान्छु ।
हे देश म मर्नु अघि मेरी आमाले बनाएको सानो काठको बाकस भर्ने पैसा बोकेर घर फर्कै भने त ठिक हो । तर, त्यो भन्दा पहिले त्यो ठूलो लामो बाकसमा म आफैँ भरिएर घर फर्के भने..........’
कवि नवराज पराजुलीले भावनात्मक गहिराइमा डुबेको यो कविता सुनाइरहँदा हलमा खचाखच भरिएका दर्शक स्तब्ध र एक्कोहोरो बने । कविता वाचनको क्रममा मुरलीको धुन र कवि पराजुलीको आवज बाहेक अरु केही सुनिन्दैनथ्यो । मानौ कुनै मौनता छाएको छ । तर, कविता सकिएपछि हल नै थर्कमान हुने गरि तालीको गडगडाहड चल्यो । 
शनिवार इटहरी जेसीज र लियो क्लब इटहरीले आयोजना गरेको कवि नवराज पराजुलीको कविता कन्र्सटमा पहिलो पटक टिकट काटेर कविता सुन्न जानेहरुलाई कोतुहलता थियो कस्ता कविता सुनाउने हुन नवराजले भनेर । विश्वको सबै भन्दा अग्लो देशको मानिस परिवारको लालनपालनका लागि कसरी खाडीको दलदलमा फस्छ भन्ने भाव बोकेको मार्मिक कविता पहिलो पटक धुन सहित सुन्दा दर्शकहरु भावुक बन्न पुगे । पराजुलिको कविता बाचन कार्यक्रममा इटहरीका विभिन्न पेशा व्यवसायमा आवद्धहरु अगुवाहरुको ठुलै सहभागिता रहेको थियो । झापाका युवा कवि पराजुलिले सुनाएको दोस्रो कविता अपागंता भएकी युवतीका बेदना मिश्रित रहेको थियो । त्यो पनि त्यत्तिकै मार्मिक थियो । कवि पराजुलीले कन्र्सटमा आफ्ना चर्चित ६ वटा कविता सुनाएका थिए । उनका हरेक कवितामा दर्शक मन्त्रमुग्ध बनेका थिए । जेसीजले शनिवारको विदालाई सदुपयोग गर्दै कविता कन्र्सटको आयोजना गरेको थियो । पराजुलीका कविता सुन्नका लागि इटहरी, धरान, इनरुवा, सप्तरी, झापा, मोरङलगायतका क्षेत्रबाट विभिन्न व्यक्तिहरु पुगेका इटहरी जेसीजका अध्यक्ष सोम गौतमले बताए । 
कविता कन्सर्टका प्रमुख अतिथि झापाली कवि मनु मञ्जीलले कवि पराजुली ठुलो सभावना बोकेको कवि रहेको चर्चा गरे । उनले वाचन गर्ने हरेक कवितामा नेपालीपन र भावनात्मक नातासँग जोडिएको बताए । इटहरी जेसीजका अध्यक्ष सोम गौतमले कवि पराजुलीका कविताले सबै सहभागिलाई सन्तुष्ट बनाएको बताए ।
कविता कन्सर्टका विषयमा कार्यक्रम संयोजक युवराज काफले प्रकास पारेका थिए ।
