उर्लाबारी । मिक्लाजुङ–७ की ४४ वर्षीया शान्ती राई तामाङ्को बलत्कार गरी हत्या गरेको आरोपमा स्थानीय ३० वर्षीय हिकबहादुर बस्नेतलाई प्रहरीले बुधबार पक्राउ गरेको छ । बस्नेत कुखुरा फारमसँगै खेती किसानी गर्दै आएका थिए ।
जिल्ला प्रहरी कार्यालय मोरङका प्रमुख प्रहरी उपरीक्षक मनोज केसीले जिल्ला र इलाका प्रहरी उर्लाबारीको संयूक्त विशेष अनुसन्धान टोलीले तीन महिना लगाएर गरेको अनुसन्धानबाट बलत्कार गरी हत्या गरेको आरोपमा बस्नेतलाई पक्राउ गर्न सफल भएको बताए ।
उक्त हत्या घटनाको बारेमा यसअघि प्रदेश संसद र संघीय संसदमा पटक पटक आवाज उठिरहेकोले प्रहरीलाई टाउको दुखाई भएको थियो ।
मिक्लाजुङ–७ स्थित कमल बोहराको घरमा फागुन १९ गते राती ११:३० बजेतिर चिन्ता हेरेर घर फर्किने क्रममा तामाङ्लाई बस्नेतले बलत्कार गरेरपछि ढुंगा प्रहार गरेर हत्या गरेको प्रहरीको आरोप छ ।
प्रहरीले फागुन २० गते बिहान मिक्लाजुङ–७ स्थित ग्यांग्री खोलामा नांगो शरीर र अनुहारमा ढुंगा प्रहार गरेर विभत्स तरिकाले हत्या गरेको अवस्थामा तामाङ्को शव फेला पारेपछि अनुसन्धान गर्दै आएको थियो ।
चिन्ता भएको घरदेखि ३/४ सय मिटर टाढा बेलगौडेमा तामाङ् एक्लै घर फर्किने क्रममा बस्नेतको भेट भएको अनुसन्धानबाट खुलेको प्रहरी उपरीक्षक केसीले बताए ।
‘चिन्ता हेर्न गएकी तामाङ् र बस्नेत दुवै जना रक्सी खाएर मातिएको अवस्थामा भेट भएको थियो,’ उनले भने, ‘तामाङ्सँग भेट भएपछि बस्नेतले खैनी र चुरोट खाँदै उनको घर सिसौलीसम्म पुर्याउन जाने क्रममा ग्यांग्री खोलामा घटना गरेको अनुसन्धानमा खुलेको हो ।’
बस्नेतले स्थानीय बिर्सना राईको होटलमा रक्सी खाएर फर्किरहेको र उनले दिनभरिमा फागुन १९ गते तीन ठाउँ रक्सी खाएको अनुसन्धानबाट खुलेको प्रहरी उपरीक्षक केसीले बताए ।
मृतक तामाङ् पनि पहिलेदेखि नै रक्सी, चुरोट, खैनी खाने गरेको पाइएको उनी भन्छन् । बस्नेतलाई कर्तव्य ज्यान र बलत्कार मुद्दामा कारबाही अघि बढाइएको उनले बताए ।
