काठमाडौँ । रुसमा जारी फिफा विश्वकपमा पाँच पटकको विश्वविजेता ब्राजिल सबैभन्दा धेरै गोल गर्ने टोली बनेको छ ।
विश्वकपको सोमबार राति भएको प्रिक्वाटर फाइनलमा दुई गोल गरेको ब्राजिल विश्वकप इतिहासको सर्वाधिक गोल गर्ने टिम बनेको हो । मेक्सिकोलाई हराएर अन्तिम ८ मा स्थान पक्का गरेको ब्राजिलले जर्मनीको नाममा रहेको सर्वाधिक गोल गर्ने रेकर्ड तोडेको हो।
विश्वकपका सबै संस्करणमा भाग लिने एक्लो टिम ब्राजिलका नेयमारले खेलको ५१ मिनेटमा गोल गर्दै जर्मनीको रेकर्ड तोडेका हुन् । नेयमारको गोल विश्वकपमा ब्राजिलका लागि २ सय २७ औं गोल हो ।
जर्मनीले विश्वकपमा २ सय २६ गोल गरेको छ। खेल सकिन २ मिनेट बाँकी छँदा फिर्मिनोले गोल गरेसँगै ब्राजिलले विश्वकपमा गोल संख्या २ सय २८ पुर्यायो। यो विश्वकपमा ब्राजिलले ७ गोल गरिसकेको छ।
विश्वकपमा बढी गोल गर्ने टिमको तेस्रो स्थानमा अर्जेन्टिना छ। अर्जेन्टिनाले १ सय ३७ गोल गरेको छ। चौथो स्थानको इटालीले १ सय २८ गोल गरेको छ भने पाँचौ स्थानको फ्रान्सले १ सय १३ गोल गरेको छ।
