काठमाडौं । रुसमा जारी फिफा विश्वकपमा ब्राजिलले अन्तिम आठको स्थान सुरक्षित गरेको छ । सोमबार राति भएको अन्तिम १६ को खेलमा मेक्सिकोलाई हराउँदै ब्राजिलले अन्तिम आठको यात्रा सुनिश्चि गरेको हो ।
ब्राजिलका स्टार स्ट्राइकर नेयमार भने आलोचनाको सिकार भएका छन् । पछिल्लो समय अतिरञ्जित फउल गर्ने गरेको भन्दै उनको आलोचना भइरहेको छ ।
तर, मेक्सिकोविरुद्धको खेलपछि प्रतिक्रिया दिँदै नेयमारले आफूलाई आलोचनाको वास्ता नभएको जवाफ दिएका छन् । मेक्सिकोविरुद्ध एक गोल र एक असिस्ट गरेका नेयमारले खेलपछि प्रतिक्रिया दिँदै आफू विवादित बन्न नचाहेको तर आलोचनाको वास्ता पनि नभएको बताएका हुन् ।
उनले भनेका छन्, ‘म मेरो आलोचनाको वास्ता गर्दिन । पछिल्ला दुई खेलमा त मैले प्रेससँग बोल्न छाडेको छु ताकि कुनै विवाद सृजना नहोस् ।’ उनले देशको जितमा सहयोग गर्न चाहेको र आफूले त्यही गरिरहेका समेत बताए ।
