काठमाडौं, २१ असार । गत निर्वाचनमा अप्रत्यासित हार व्यहोरेपछि नेपाली कांग्रेसभित्र देखिएको आन्तरिक विवाद तत्कालका लागि केहि साम्य भएको छ ।
सभापति शेरबहादुर देउवा र नेता रामचन्द्र पौडेलसहित शिर्ष नेताहरुको बैंठकले पार्टीभित्र देखिएको विवाद अन्त्य गरी सरकारका गलत क्रियाकलापको विरुद्धमा सशक्त आवाज उठाउने रणनीति बनाएको छ ।
सरकार निरंकुश, स्वयच्छाचारी र अधिनायकवादतर्फ उन्मुख भएको भन्दै कांग्रेसले संसद र सडकमा सरकारका गलत क्रियाकलापको संगठित भएर सामना गर्ने तयारी गरिरहेको छ ।
गंगामाया अधिकारी र डा.गोविन्द केसीका माग पूरा गराउन पनि कांग्रेसले सरकारलाई सडक र सदनमा दवाव दिने बताएको छ ।
बैंठकमा सरकारको कामकारबाही, संसदमा प्रभावकारिता, डा.गोविन्द केसी र गंगामाया अधिकारीको अनशनका बारेमा छलफल भएको नेता बालकृष्ण खाणले जानकारी दिए ।
सरकारले संविधान र ऐन विपरितका गतिविधि गरेको ठहर कांग्रेसको छ । हरेक ठाउँमा निषेधाज्ञा राखेर प्रदर्शनबाट ओली सरकार डराएको, गोविन्द केसी र गंगामाया अधिकारीको मागका बारेमा उदाशिन भएको आरोप कांग्रेसको छ ।
सरकारले आफूलाई नागरिकका पक्षमा प्रस्तुत गर्न नसकेको भन्दै कांग्रेसले सरकारका गलत कुरालाई अंकुश लगाउन दवाव दिन कुनै कसुर बाँकी नराख्ने बताएको छ ।
