काठमाडौँ, असार २८ । नेपाल कम्युनिस्ट पार्टीका सांसद महेश बस्नेतले सामाजिक सञ्जालमा पानी जहाजको कुरा गर्नेलाई साइबर क्राइममा कारबाही गर्नुपर्ने माग गरेका छन् ।
संसदमा विशेष समयमा बोल्दै सांसद बस्नेतले भक्तपुरका जनताहरु दुःखमा रुमलिएका बेला सामाजिक सञ्जालमा बाढीको फोटो हालेर पानीजहाजको उछितो काडी मानवीय संवेदनामाथि खेलबाड गर्नेलाई सञ्चार मन्त्रालयले साइबर क्राइममा कारबाही गर्नुपर्ने माग राखेका हुन् ।
उनले भक्तपुरमा सडकमा बाढी आएको फोटो हालेर पानी जहाजको कुरा गरेर मानवीय संवेदनामाथि खेल्ने काम भएको बताए ।
‘भक्तपुरका जनताहरु बाढीको पीडामा अलमलिरहनुभएको छ । कतिपय मान्छे सामाजिक सञ्जालमा फोटो खिचेर पानीजहाज आएछ भनेर उडाइरहेका छन्’ उनले भने ‘सक्नुहुन्छ भने बाढीपीडित भक्तपुर र देशभरिका जनतालाई सहयोग गर्नुस् सक्नुहुन्न भने यो संवेदनामा खेलेर पानीजहाजको कुरा नगर्नुस् यो वाहियात कुरा गर्नेलाई कारबाही गर्नुपर्छ । साइबर क्राइमलाई कडा ढंगले लागू गर्नैैपर्छ ।’
यसवर्ष भक्तपुर निकै पीडामा रहेको उनले बताए ।
