‘रगतमा धर्म र जातीको रङ हुँदैन’–नगर प्रमुख फागो

रुपेन्द्र शेर्मा

उर्लाबारी, ३ साउन ।
उर्लाबारी नगरपालिकाका प्रमुख खड्ग फागोले आज नेपाल रेडक्रस सोसाइटी उपशाखा उर्लाबारीको नवनिर्मित तीन कोठे पक्की भवनको उद्घाटन गर्नुभयो ।
त्यस अवसरमा नगर प्रमुख फागोले रगत हरेक प्राणीका लागि अत्यन्तै महत्वपूर्ण भएकोले त्यसमा कुनै भेदभाव गर्न नहुने बताउनुभयो । उहाँले रगतमा कुनै धर्म र जातीको रङ नहुने भएकाले विमारीलाई विना पक्षपात रगत प्रदान गर्न सुझाव दिनुभयो । मानवीय सेवामा समर्पित रेडक्रस प्रति जनताले ठूलो अपेक्षा गरेको बताउँदै नगर प्रमुख फागोले प्रक्रिया पुर्याउनेलाई निर्वादरुपमा रगत प्रदान गर्न आग्रह गर्नुभयो ।
रेडक्रसका केन्द्रीय अध्यक्ष सञ्जिव थापाले रगतको विकल्प नभएको र विज्ञानले पनि रगतको विकल्प निकाल्न नसकेकोले यो अत्यन्तै महुत्वपूर्ण भएको राय व्यक्त गर्नुभयो । रेडक्रसले द्वन्द्वकालमा समेत विपद र जोखिममा परेकालाई सहयोग गर्र्दै आएको उल्लेख गर्दै थापाले भुकम्प पीडितहरुका लागि आवास, स्वास्थ्य, खानेपानी र जीवीकोपार्जनको क्षेत्रमा अहिलेपनि काम गरिरहेको जानकारी दिनुभयो । २०२३ सालदेखि रेडक्रसले नेपालमा रक्त सञ्चार सेवा सञ्चालन गर्दैआएको बताउँदै थापाले उर्लाबारी रेडक्रसले सञ्चालन गर्ने रक्त सञ्चार सेवाको उद्घाटन गर्नुभयो ।
उर्लाबारी रेडक्रसका अध्यक्ष मदनबाबु प्रसाईको अध्यक्षतामा भएको सो कार्यक्रममा रेडक्रस मोरङका अध्यक्ष सुवोद सिँह, उर्लाबारी उद्योग वाणिज्य संघका अध्यक्ष भरत भट्टराई, रक्त सञ्चार केन्द्रकी निर्देशक मनिता राजकर्णिकारलगायतले बोल्नुभएको थियो ।
उर्लाबारी–४ स्थित आइतबारेमा निर्मित रेडक्रस भवन उद्घाटन गरिएको हो । उर्लाबारी नगरपालिकाको नौलाख रुपैयाँ सहयोग र सात लाख रुपैयाँ चन्दा संकलन गरी करिब १६ लाख रुपैयाँको लागतमा सो भवन निर्माण गरिएको कार्यक्रम संयोजक विजय कार्कीले जानकारी दिनुभयो ।