देबु बानियाँ
सुनवल । संघियतापछि थप भएका वडाहरुलाई समेट्दै सुनवल नगरपालिकालाई बालमैत्री स्थानीय तह नगरपालिका घोषणा गरिएको छ ।
सुनवल नगरपालिका वडा नम्बर १२ मा आयोजित एक कार्यक्रमकाबीच प्रदेश नम्बर ५ का मुख्य मन्त्री शंकर पोखरेलले सुनवल नगरपालिकालाई बाल मैत्री नगरपालिका भएको घोषणा गरेका थिए ।
कार्यक्रमका प्रमुख अतिथि समेत रहेका मुख्य मन्त्री पोखरेलले सुनवल नगरपालिकाले गरेको अभियानको प्रशंसा गरेका थिए । उनले अबका दिनमा यस नगरपालिकाका सबै बालबालिकाले शिक्षा, स्वास्थ्यलगायतका क्षेत्रमा थप उत्साहका साथ सदुपयोग गर्दै आगामी दिनमा यहाँका बालबालिका अन्य क्षेत्रका बालबालिका भन्दा फरक हुने बताए ।
सोही अवसरमा रामनगर जेसीजले ग्रीन रामनगर अन्तरगतको अभियानलाई निरन्तरता दिँदै दोस्रो चरणको वृक्षारोपण समेत गरेको थियो । यस क्षेत्रलाई स्वच्छ तथा हराभरा क्षेत्र बनाउने अभियानका साथ सुनवल नगरपालिकाको सहकार्यमा सुरु गरेको अभियानलाई थप सहयोग गर्दै जाने सुनवल नगरपालिकाका कार्यकारी प्रमुख भीमबहादुर थापाले बताए ।
सुनवल नगरपालिका क्षेत्रलाई सरसफाइ, बालश्रम तथा मानव वेचविखनको सचेतनामुलक कार्यक्रम गदै आएको रामनगर जेसीजलाई सो अवसरमा सम्मान गरिएको थियो । रामनगर जेसीजका अध्यक्ष भोजराज चापागाईलाई कार्यक्रमका प्रमुख अतिथि मुख्य मन्त्री शंकर पोखरेले सम्मान गरेका थिए ।
कार्यक्रम सुनवल नगरपालिकाका कार्यकारी अधिकृत भीम बहादुर थापाको अध्यक्षतामा सप्पन्न भएको थियो ।