महोत्तरीको लोहारपट्टी नगरपालिका- ३ स्थित महदैया तपनपुरमा नमाज पढाउने विषयमा विवाद हुँदा १३ जना घाइते भएका छन् । पहिला आफ्नो पक्षलाई नमाज पढाउनु पर्ने भन्दै राजपा र कांग्रेस दुई पक्षधरहरुको विवादले झडपको रुप लिएको स्थानीयले बताएका छन् ।
बकर इदको नमाज पढाउन हरेक वर्ष भारतबाट मौलवी आउने गरेकोमा यस वर्ष एकजना मात्र मौलवी आएको र काँग्रेस पक्षको नमाज पढाउन लाग्दा राजपा पक्षधरहरुले आएर पहिला हामीलाई पढाउनु पर्छ भनेपछि झडप सुरु भएको घटना स्थलका प्रत्यक्षदर्शीले बताए ।
८ वर्षीय बालिकासहित ४ महिला र ८ पुरुष घाइते भएका छन् । उनीहरुको अंचल अस्पताल जनकपुरमा उपचार भैरहेको प्रहरीले जनाएको छ । झडपको खबर पाएलगत्तै रामगोपालपुर, लोहारपटटी र जिल्लाको प्रहरी निरीक्षक समेतको टोली घटनास्थल पुगेको थियो । दुवै पक्षबाट दुई दुई जना झडपका जिम्मेवार व्यक्तिहरुलाई प्रहरीले नियन्त्रणमा लिएको छ ।
समाचार संकलनमा संचारकर्मीलाई अवरोध
झडपको समाचार संकलन गर्न गएका पत्रकार वावु प्रेम यदुवंशी र धर्मेन्द्र यादवलाई काँग्रेस पक्षधरले हाम्रो पक्षको घाइतेहरुको नाम किन टिपेको भन्दै नाम लेखेको कापी खोस्ने प्रयास गरेका थिए । काँग्रेस पक्षका असरफ नदाफ भन्ने व्यक्तिले नाम लेखेको पाना खोस्न खोजेको पत्रकार वावु प्रेम यदुवंशीले बताए ।
