झापा । छोरीको हत्या आरोपमा एक महिला पक्राउ परेकी छिन्। बिर्तामोड नगरपालिका–५ सुब्बा चोक बस्ने २७ वर्षीया हेमन्ता कुरुम्बाङ लिम्बुलाई प्रहरीले पक्राउ गरेको हो।
उनले आफ्नै ८ वर्षिय छोरी सफल्ता कुरुम्बाङ लिम्बुलाई कुटेको र उपचारको क्रममा उनको मृत्यु भएको प्रहरीले जनाएको छ। प्रारम्भिक अनुसन्धानमा स्कुल जानुअघि कपाल कोर्न नमानेको भनेर उनले कुटेकी थिइन्। छोरी गम्भीर भएपछि उनी आफैंले अस्पताल लगिन्। उपचारको क्रममा बिर्तासिटी अस्पतालमा उनको मृत्यु भयो।
प्रहरीका अनुसार पक्राउ परेकी आमा बिक्षिप्त अवस्थामा छिन्। उनले घटनाबारे राम्रोसँग बताउन सकेकी छैनन्।
उनका श्रीमान बैदेशिक रोजगारीको क्रमका दक्षिण कोरियामा छन्। छोरीको मृत्युको खबर पाएपछि उनी नेपाल आउने प्रक्रियामा छन्।
इलाका प्रहरी कार्यालय अनारमनीले घटनाको अनुसन्धान अघि बढाएको छ।
