कञ्चनपुरकी १३ वर्षीया बालिका निर्मला पन्त हत्याकाण्डको अपराधी वास्तविक अपराधि सार्वजनिक गनुपर्ने विषयलार्इ लिएर सुरु भएको आन्दोलन अनियन्त्रित हुन थालेपछि प्रशासनले कर्फ्यू लगाउने तयारी गरेको छ ।
जिल्ला प्रशासन कार्यलयमा तीनवटा सुरक्षा निकायका प्रतिनिधिसँग भएको छलफलबाट बिहीबार साँझ ५ बजेदेखि शुक्रबार बिहान ५ बजेसम्मका लागि कर्फयू लगाउने निर्णय भएको प्रमुख जिल्ला अधिकारी कुमार बहादुर खड्काले बताएका छन् ।
उनले कुनकुन स्थानमा कर्फ्यू लगाउने भन्नेबारे छलफल चलिरहेको र केही समयमा निर्णय सार्वजनिक गर्ने बताएका छन् ।यसअघि बिहीबार दिउँसो प्रदर्शनकारीले पुर्वपश्चिम राजमार्ग अन्तर्गत ट्राफिक चोक र प्रशासनतिर ढुङ्गामुढा गर्न थालेपछि प्रहरीले चलाएको गोली लागेर चार प्रदर्शनकारी घाइते भएका थिए।
कैलाली गाउँपालिका–३ का २४ वर्षीय सन्तोषकुमार कठरिया, भीमदत्त नगरपालिका–२ भाँसीका ३६ वर्षीय तेजराज भट्ट, भीमदत्त नगरपालिका–४ महेन्द्रनगरका १९ वर्षीय अर्जुन भण्डारा र कञ्चनपुरकै किरनप्रसाद पाण्डेय घाइते भएका छन् ।
नीहरुको अहिले महाकाली अञ्चल अस्पतालमा उपचार भइरहेको छ । कठरिया, भण्डारा र पाण्डेको खुट्टामा गोलीको छर्रा लागेको छ भने भट्टको टाउको र खुट्टामा गोलीका छर्रा लागेको छ ।
