काठमाडौं । नेपाल चिकित्सक संघले आज डाक्टरहरुको प्रमाणपत्र लाइसेन्स) मेडिकल काउन्सिलमा फिर्ता गर्ने भएको छ ।
१ भदौबाट कार्यान्वयमा आएको मुलुकी फौजदारी संहिता संशोधनको माग गर्दै संघले भोलि देशभर आकस्मिक बाहेकका सेवा बन्द गर्न आहृवान गरेको छ । आज१० बजे माइतीघर मण्डला भेला हुने र मेडिकल काउन्सिल गएर प्रमाणपत्र बुझाइने संघका अध्यक्ष डा. मुक्तिराम श्रेष्ठले अनलाइनखबरलाई बताए ।
संघले देशभरका चिकित्सकहरुलाई भदौ १५ सम्म आफ्नो प्रमाणपत्र बुझाउन भनेको थियो । अहिलेसम्म ३ हजार बढी चिकित्सकको प्रमाणपत्र जम्मा भएको र त्यसलाई आज काउन्सिलमा बुझाउन लागिएको श्रेष्ठले बताए ।
यसअघि भदौ १ मा नै चिकित्सकहरुले प्रमाणपत्र काउन्सिलमा बुझाउने बताएका थिए । तर, सरकारले मुलुकी ऐन संशोधनको आश्वासन दिएपछि रोकिएको थियो । ‘कानुन संशोधन कुन जति समय लाग्छ लिनुस् तर, प्रक्रिया त सुरु गर्नुस् भनेका थियौं’ श्रेष्ठले भने, ‘वार्तामा सकारात्मक कुरा भएपनि प्रक्रिया सुरु भएकाले हामीले चिकित्सकहरुको प्रमाणपत्र बुझाउन लागेका हौं ।’
उनकाअनुसार प्रमाणपत्र बुझाएपछि मेडिकल काउन्सिलले लिस्टबाट नहटाएसम्म डाक्टरहरुले उपचार गर्न सक्छन् । तर, बिहीबारदेखि भने देशभर आकस्मिक बाहेक सबै सेवा बन्द गर्ने घोषणा चिकित्सक संघले गरेको छ ।
मुलुकी फौजदारी सहितामा उपचारका क्रममा लार्पवाहीले विरामीको मृत्यु भएमा ज्यान मुद्दा चलाउने प्रावधान छ । चिकित्सक संघले भने त्यसलाई संशोधन गरेर लार्पवाही भए नभएको विज्ञ समूहले अध्ययन गर्ने थप गर्न माग गरेको छ ।
