काठमाडौँ, भदौ २५ । काठमाडौँको किर्तिपुरमा दुई बालिकालाई बन्धक बनाएर बलात्कार गरेको अभियोगमा २५ वर्षीय युवक पक्राउ परेका छन् ।
बलात्कारको अभियोगमा महानगरीय प्रहरी वृत्त, कीर्तिपुरका डिएसपी अनिलकुमार खड्काको टोलीले कैलालीको घोडाघोडी घर भइ हाल काठमाडौँ १७ हनुमानघाट बस्ने २५ वषीय हेमबहादुर खत्रीलाई पक्राउ गरेको हो ।
सिन्धुपाल्चोक घर भएका हाल ललितपुरको इमाडोल डेरा गरी बस्ने १४ र १३ वर्षीया बालिकालाई खत्रीले चार दिनसम्म बन्धक बनाई बलात्कार गरेको प्रहरीको दावी छ ।
उनले आफ्नो डेरमा बन्धक बनाइ राखेको अवस्थामा प्रहरीले आइतबार साँझ ती बालिकाको उद्धार गरी उनलाई नियन्त्रणमा लिएको हो । प्रहरीका अनुसार यही भदौ २१ गते साँझ बानेश्वरको गाडीमा चढेका दुई बालिकाहरुलाई सोही गाडीमा रहेका खत्रीले दुवै बालिकालाई ललाई–फकाई आफ्नो डेरामा लगेर बन्धक बनाएका हुन् ।
पीडित दुवै बालिकालाई स्वास्थ्य परीक्षणका लागि थापाथलीस्थित प्रसूति गृह पठाइएको र अभियुक्त खत्रीलाई हिरासतमा राखी घटनाबारे अनुसन्धान भइरहेको प्रहरीले जानकारी दिएको छ ।
