विराटनगर, । भदौ २४ गते हत्या गरिएका नेपाल तरुण दलको रोल्पा जिल्ला लिवाङ नगरपालिका सभापति रोहित पुनको स्मृतिमा विराटनगरमा श्रद्धाञ्जलिसभा गरिएको छ ।
नेपाल तरुण दल महानगर कार्यसमितिले पुनको स्मृतिमा स्थानीय ट्राफिकचोकमा श्रद्धाञ्जलिसभा गरेको हो । नेपाली कांग्रेसका प्रदेश र जिल्लास्तरीय नेताहरूको समेत सहभागितामा सभा गरिएको हो । कार्यक्रममा मैनबत्ती बालेर पुनलाई श्रद्धाञ्जलि अर्पण गरिएको थियो । श्रद्धाञ्जलिसभामा बोल्ने वक्ताहरूले सरकारकै संरक्षणमा हत्या हिंसा भइरहेको आरोप लगाए । प्रदेशसभा सदस्य विन्द्या कार्कीले पुनको हत्या कायरतापूर्ण भएको भन्दै घटनाको भत्र्सना गरिन् ।
कार्यक्रमका सहभागीले हत्या हिंसाको विरोध गर्दै कालोपट्टी बाँधेका थिए । सो क्रममा मृतक पुनलाई श्रद्धाञ्जलि दिंदै एक मिनेट मौनधारणसमेत गरिएको थियो । कार्यक्रममा तरुण दल मोरङका अध्यक्ष सञ्जय थापा प्रभाकर, कोषाध्यक्ष लक्ष्मी रिजाल, महानगर समितिका अध्यक्ष सन्तोष न्यौपानेलगायतका तरुण नेताहरूले हत्यारालाई कडा कारबाही गर्न माग गरेका थिए ।
यसैबीच, नेपाल तरुण दल मोरङले हत्यारालाई कडा कारबाही गर्न माग गर्दै सरकारलाई ज्ञापनपत्र पठाएको छ । अध्यक्ष सञ्जय थापा प्रभाकरको नेतृत्वमा जिल्ला प्रशासन पुगेको टोलीले प्रमुख जिल्ला अधिकारीमार्फत ज्ञापनपत्र पठाएको हो ।