उर्लाबारी, १ असोज । उर्लाबारी नगरपालिकाका प्रमुख खड्ग फागोले प्राकृतिक श्रोत र साधनलाई उपयोग गर्न सके राष्ट्र समृद्ध हुने बताउनुभएको छ । तर नैतिकता र इमान्दारिताको राजनीतिबाट मात्र यो सम्भव हुने उहाँको भनाई छ ।
स्वतन्त्र निर्माण व्यवसायी मजदुर संघद्वारा सोमबार मोरङको उर्लाबारीमा आयोजित विश्वकर्मा पुजा समारोहलाई सम्बोधन गर्दै फागोले पाँच बर्षभित्र उर्लाबारीलाई नमुना नगरपालिका बनाएरै छाड्ने दृढ्ता व्यक्त गर्नुभयो । जनभावना माथि खेडवाड गर्ने अधिकार कसैलाई पनि नभएको बताउँदै फागोले जनताले तिरेको करको सदुपयोग गरी विकासको गति अगाडि बढाइएको जानकारी दिनुभयो ।
मजदुरको पारीश्रामिकमा बृद्धि गरी विपन्न मजुदरका लागि दुई लाख रुपैयाँ सम्मको विमाको व्यवस्था गरिएको उहाँले बताउनुभयो । सर्वसाधारणको हितलाई ध्यानमा राखी बालुवा र गिट्टीको दररेटमा घटाइएको जानकारी दिँदै फागोले उर्लाबारीको भूगोल, अवस्था र आयश्रोतलाई हेरेर कर निर्धारण गरिएको बताउनुभयो ।
संघका अध्यक्ष मनोज लुइंटेलको अध्यक्षतामा भएको सो कार्यक्रममा उर्लाबारी उद्योग वाणिज्य संघका अध्यक्ष प्रितम खड्गी, महासचिव शेरबहादुर भण्डारी, नेपाल रेडक्रस सोसाइटी शाखा उर्लाबारीका सभापति मदनबाबु प्रसाईलगायतले बोल्नुभएको थियो ।
