पथरीशनिश्चरे, २ असोज
मोरङको पथरीशनिश्चरे नगरस्थित डाँस गंगासागर आर्यघाटमा पहिलो शव दहन भएका परिवारलाई नगरपालिका कार्यालयले २० हजार रुपैयाँ राहत सहयोग प्रदान गरेको छ ।
नगरपालिका कार्यालयमा नगर प्रमुख दिलिपकुमार राई, उपप्रमुख यमुना विष्ट वास्तोला, कार्यपालिका सदस्य मैनादेवी फुयाँल आचार्यले आज मृतककी श्रीमती निर्मला कार्कीलाई २० हजार रुपैयाँको चेक हस्तान्तरण गर्नुभयो ।
आर्यघाट उद्घाटनका सन्दर्भमा पहिलो पटक वडा नम्वर १० का मृतक रामबहादुर कार्कीको शव दहन गरिएको थियो । त्यसबेला नगर प्रमुख राईले पहिलो शव दहन हुने परिवारलाई २० हजार रुपैयाँ राहत उपलब्ध गराउने घोषणा गर्नु भएको थियो ।
नगरपालिकाको १० लाख रुपैयाँको लागतमा वडा नम्वर १० जिरिखिम्ती उत्तरमा डाँस गंगासागर आर्यघाट निर्माण भएको हो ।
