उर्लाबारी, २ असोज । स्वतन्त्र निर्माण व्यवसायी मदजुर संघ उर्लाबारीको १३ औं चुनावी साधारणसभा मंगलबार उर्लाबारी–५ स्थित बौद्ध गुम्बामा सम्पन्न भएको छ ।
साधारणसभामा प्रमुख अतिथि उर्लाबारी नगरपालिकाका प्रमुख खड्ग फागोले नगर क्षेत्रमा सुरक्षित र भरपर्दो आवास निर्माणका लागि सिकर्मी र डकर्मीहरुको सिप तथा क्षमता अभिबृद्धि गरिने बताउनुभयो । सिकर्मी र डकर्मीहरुको सिप तथा क्षमता अभिबृद्धिका लागि तालिम सञ्चालन गरिने बताउँदै फागोले लाइसेन्स प्राप्त सिकर्मी र डकर्मीहरुलाई मात्र काम गर्न अनुमति दिइने उल्लेख गर्नुभयो । घरनक्शा पास गरेर मात्र नगर क्षेत्रमा आवास निर्माण गर्न दिइने उल्लेख गर्दैै फागोले नागरिकहरुको प्रतिभा र क्षमता विकासका लागि नगरपालिकाले बजेट विनियोजन गरेको जानकारी दिनुभयो ।
सो सभाले स्वतन्त्र निर्माण व्यवसायी मदजुर संघ उर्लाबारीको अध्यक्षमा मनोज लुइंटेललाई पुन ः निर्बिरोध निर्बाचित गरेको छ । संघका उपाध्यक्षमा गोपाल काफ्ले, महासचिवमा डोमनाथ खतिवडा, सचिवमा हरि नेपाली, कोषाध्यक्षमा सुवास विश्वास तथा सदस्यहरुमा पशुपति श्रेष्ठ, खेम तामाङ, कुल महमद, जुगराज खड्का, सहिदु रहमान र तेजन राजवंशी निर्विरोध निर्बाचित भएका छन् ।
