काठमाडौं । कञ्चनपुरकी किशोरी निर्मला पन्तको बलात्कारपछि हत्या भएको घटना छानविन गर्न बनेको सहसचिव नेतृत्वको उच्चस्तरीय छानविन समितिको प्रतिवेदनले घटनाको दोषी किटान नगरी प्रतिवेदन बुझाएको छ ।
दोषी किटान नगरेपछि सो प्रतिवेदन अस्वीकार गर्ने चेतावनी सरोकारवालाहरुले दिएका छन् । सरोकारवालाहरुले छानविन समितिको प्रतिवेदन तत्काल सार्वजनिक गर्न पनि माग गरेका छन् ।
निर्मलाका बाबु यज्ञराज पन्तले समितिको प्रतिवेदनले न्याय पाउनेमा आशंका रहेको बताउदै भने ‘उच्चस्तरीय छानविन समितिले बुझाएको प्रतिवेदनमा पूर्ण विश्वास हुने अवस्था छैन ।
प्रतिवेदनबाट न्याय पाउने आशा छैन । प्रतिवेदनले मुख्य दोषी एसपी डिल्लीराज विष्टलाई ठहर गर्दै प्रमाण नष्ट गर्ने विष्टलाई कारबाही गर्नुपर्ने उल्लेख गरेको छ । बलात्कारी र हत्यारालाई सरकारले कहिले कारबाही गर्छ ?
प्रतिवेदनले दोषी को हो भनेर भन्न सकेको छ कि छैन ? सबैको चासो त्यो हो । न्याय खोजेका छौँ’ निर्मलाका बुबा यज्ञराजले भने ।
उच्चस्तरीय छानविन समितिका सदस्य वीरेन्द्र केसीले प्रधानमन्त्री केपी ओली अमेरिकाबाट आएपछि गृहमन्त्री रामबहादुर थापालाई बुझाइएको प्रतिवेदन सल्लाह गरेर सार्वजनिक गर्ने उल्लेख गरे ।
‘क-कसको कमजोरी छ हामीले प्रतिवेदनमा लेखेका छौं’, केसीले भने, ‘निर्मलालाई बलात्कार गरेर हत्या गरिएको छ ।
दोषीहरू को-को हुन् नाम छ । हामी जाँदा हत्याको एक महिना भइसकेको थियो । हामीले भेटाएका र प्राप्त कुरा कसरी भयो भनेर राय सुझाव सहित प्रतिवेदनमा राखिएको छ ।’
प्रतिवेदनले अनुमानका बारेमा केहि पनि भनेको छैन । ‘हामीले अनुमानका भरमा केही भनेका छैनौँ । निर्मलाका बाबुआमाले पनि किटानी जाहेरी दिएका छैनन्’, केसीले भने, ‘यस्तो अवस्थामा हामीले कसरी दोषी तोक्ने ? हामीले प्रमाणका आधारमा प्रतिवेदन तयार पारेका छौँ । दोषी तोकेका छैनौँ ।’
उच्चस्तरीय छानविन समितिले मंगलबार निर्मला पन्तको बलत्कारपछि हत्या भएको विषयमा आफ्नो प्रतिवेदन गृहमन्त्री थापालाई बुझाएको थियो ।
समितिको प्रतिवेदन सार्वजनिक नगरेर गृहमन्त्री थापाले लुकाएर राखेपछि आलोचना भएको छ । पीडित पक्षले पनि समितिको प्रतिवेदनबाट न्याय पाउनेमा आशंका जनाउँदै आएका छन् । अभियान टाइम्सका साथमा ।
