काठमाडौँ, असोज १५ । बलात्कारपछि हत्या गरिएकी कञ्चनपुरकी १३ वर्षीया निर्मला पन्तको हत्याबारे उच्चस्तरीय छानविन समितिले तयार पारेको प्रतिवेदन सार्वजनिक गर्न माग गर्दै नेपाल विद्यार्थी संघ (नेविसंघ) ले सोमबार शैक्षिक हड्ताल आह्वान गरेको छ ।
हत्या भएको दुई महिना बितिसक्दा पनि निर्मला हत्याको दोषी पत्ता नलागेपछि नेविसंघले जिल्लामा सोमबार शैक्षिक हड्ताल आह्वान गरेको हो । आइतबार साँझ राँके जुलुस निकालेको नेविसंघले सोमबार शैक्षिक हड्ताल घोषणा गरेको हो ।
निर्मलाका हत्यारालाई सरकारले संरक्षण गरिरहेको नेविसंघको आरोप छ । हत्यारा पक्राउ नपर्दासम्म आन्दोलन नरोकिने नेविसंघले जनाएको छ ।
शंकाको घेरामा तानिएका एसपी डिल्लीराज विष्ट, उनका छोरा किरण विष्ट र भीमदत्त नगरपालिकाका मेयर सुरेन्द्र विष्टका भतिजा आयुष विष्टको डिएनए रिपोर्ट म्याच नगरेपछि घटना र अनुसन्धान झनै जटिल बन्ने देखिन्छ ।
गत साउन १० गते पढ्न भनेर साथीको घरमा गएकी निर्मलाको बलात्कारपछि हत्या गरेको अवस्थामा उखुबारीमा शव फेला परेको थियो ।
त्यसपछि घटनाको अनुसन्धानमा खटिएका प्रहरीबाटै लापरबाही भएको भन्ने निश्कर्ष निकाली गत भदौ ७ गते गृहमन्त्रालयले सहसचिव हरिप्रसाद मैनालीको संयोजकत्वमा उच्चस्तरीय छानविन समिति गठन गरेको थियो ।
छानविन समितिले गृहमन्त्रीलाई अनुसन्धानको प्रतिवेदन समेत बुझाइसकेको छ । गृहमन्त्रीले प्रतिवेदन सार्वजनिक गर्ने तयारी भइरहेको बताउँदै आएका छन् ।
निर्मलाका निम्ति न्याय खोज्दै उनका आमाबाबुले प्रधानमन्त्रीसँग भेटवार्ता समेत गरिसकेका छन् । प्रधानमन्त्रीले यस विषयमा गम्भीर ध्यानाकर्षण भएको भन्दै दोषीलाई छिट्टै कानूनको कठघरामा उभ्याउने आश्वासन दिएका थिए ।
