काठमाडौ : थारू समुदायको पहिचान र अधिकारका लागि सम्पूर्ण थारू समुदाय एकताबद्ध भएर अघि बढ्नुपर्नेमा अगुवाले जोड दिएका छन् ।
राष्ट्रिय जितिया पर्वका अवसरमा थारू महिला सभा काठमाडौँ उपत्यका समितिले यहाँ आयोजना गरेको कार्यक्रका वक्ताले आदिवासी थारूले लामो सङ्घर्ष र बलिदानबाट प्राप्त अधिकारको संस्थागत तथा बाँकी मुद्दालाई टुङ्गोमा पु¥याउन राजनीतिक दल तथा व्यक्तिगत स्वार्थभन्दा माथि उठ्नुपर्ने खाँचो औँल्याए ।
नेपाली काङ्ग्रेसका नेता विजयकुमार गच्छदारले थारूको पहिचान र अधिकारका लागि पार्टीभन्दा माथि उठेर एकताबद्ध ढङ्गले मुद्दामा केन्द्रित हुनुपर्ने धारणा राख्नुभयो ।
थारूको आपसी विभाजन र मुद्दामा बेइमेलकै कारण थारू आन्दोलन निष्कर्षमा पुग्न नसकेको भन्दै अबको दिनमा मुद्दालाई एकताबद्ध भई सशक्त र प्रभावकारी रुपमा अघि बढाइने उल्लेख गर्नुभयो ।
पूर्वउपप्रधानमन्त्रीसमेत रहनुभएका नेता गच्छदारले थारू आन्दोलनका क्रममा विभिन्न मुद्दामा जेल परेका अगुवा रेशम चौधरीलगायत थारू नेताहरु केही दिनमै जेलमुक्त हुने दाबी गर्नुभयो ।
नेपाल कम्युनिष्ट पार्टी (नेकपा)का सांसद अमनलाल मोदीले थारूको मुद्दाका लागि सुदृढ एकता अपरिहार्य भएको उल्लेख गर्नुभयो ।
अर्का सांसद गङ्गा चौधरी र मेखमणि चौधरीले थारू जातिको पहिचान र अधिकारको आन्दोलनलाई सार्थक तुल्याउन व्यक्तिगत स्वार्थ र पार्टीभन्दा माथि उठेर एकताबद्ध भएर अघि बढ्नुपर्नेमा जोड दिनुभयो ।
थारू कल्याणकारिणी सभाका कार्यवाहक अध्यक्ष कन्नुलाल चौधरीले थारूप्रति राज्यले गर्ने व्यवहारमा अझै परिवर्तन नभएको गुनासो गर्दै पार्टी र आस्था जुनसुकै भए पनि सच्चा थारू भएको पहिचानको अधिकारका लागि एकजुट हुनुपर्छ भन्नुभयो ।
थारू महिला सभाका अध्यक्ष तारा चौधरीले थारू समुदायको राष्ट्रिय पर्व जितियालाई राजधानीमा बसोबास गर्ने थारू समुदायबीच आपसी भाइचारा र सद्भाव कायम गर्न विगत केही वर्षदेखि काठमाडौँमा कार्यक्रम गर्दै आएको बताउनुभयो ।
कार्यक्रममा थारू, संस्कृति, पहिचान झल्कने विविध सांस्कृतिक प्रस्तुति गरिएको थियो । थारू वेशभूषामा सजिएका थारू महिला तथा युवाको उल्लेख्य सहभागिता रहेको थियो ।
सो अवसरमा थारू अधिकारको अभियानमा योगदान गर्ने केशरी चौधरी, सीता चौधरी, रञ्जना चौथरी, डा नरेन्द्रकुमार सिंह लगायतलाई सम्मान गरियो ।
–––
