मेचीनगर । झापा मेचीनगरको वडा नम्बर १ र ४ जोड्ने सुर्योदय मार्गको करिव ६ किलो मिटर सडकको स्तरोन्नति गर्ने काम पुरा भएको छ । मेचीनगर—४ का वडा अध्यक्ष नवीन वरालका अनुसार मेचीनगर—४ को हात्ती रिसोर्टदेखि वडा नम्बर—१ को सीमा भोर्लेनी शिवालय मन्दिरसम्म साढेतीन मिटर चौडाई भएको सडकको स्तरोन्नति गर्ने काम पुरा भएको हो ।
वडाको इन्धन बजेटबाट ४ लाख ५० हजार रुपैयाँको लागतमा वडा अध्यक्ष वरालको सक्रियतामा वडावासीको श्रमदान तथा विभिन्न संघ संस्थाहरु, राजनीतिक दलहरुको सहयोगमा चार दिनमा उक्त कार्य सम्पन्न भएको हो वडा अध्यक्ष वरालले बताउनुभयो ।
उहाँका अनुसार जुन कार्य सम्पन्न गर्न करिव ३० लाख रुपैयाँ खर्च हुने अनुमान गरिएको थियो तर वडा कार्यालयको अगुवाईमा स्थानीयहरुको सक्रियतामा उक्त सडक ५ लाख भन्दा कममा नै सम्पन्न भएको अध्यक्ष बरालले बताउनु भयो । सडक स्तरोन्नतिका लागि स्थानीयवासीले स्वतःस्फूतरुपमा श्रमदान समेत गरेको वडाध्यक्ष वरालले जानकारी दिनुभयो । नगरपालिकाले पनि ट्रिपर, जेसीभीलगायतका यान्त्रिक उपलब्ध गराएको थियो ।
कार्य सम्पन्न गर्न वडा अध्यक्ष वरालले व्यक्तिगतरुपमा ७५ हजार रुपैयाँ बराबरको यान्त्रिक सहयोग गर्नुभएको थियो । यसैगरी अन्य व्यवसायीहरुले समेत एकलाख रुपैयाँभन्दा बढीको सहयोग गरेका थिए । बाटोको स्तरोन्नति भएपछि सवारी चालकदेखि सर्वसाधारणले समेत राहत महशुस गरेका छन् । पुरानो सीमावर्ती बजार बाहुनडाँगी जोड्ने सो बाटामो खाल्डाखुल्डीका कारण यात्रुहरुले समस्या व्यहोर्दै आएका थिए । बाटो स्तरोन्नति भएसँगै इलामको रोङ गाउँपालिकाको सलकपुर आवत जावत गर्न सजिलो भएको छ । 
