काठमाडौँ, असोज १८ । प्रधानमन्त्री केपी शर्मा ओलीले नेकपाका वरिष्ठ नेता माधवकुमार नेपालले भनेको कुरामा कुनै आपत्ति नभएको बताएका छन् ।
अमेरिको १३ दिने औपचारिक भ्रमण सकाएर बिहिबार स्वदेश फर्केका प्रधानमन्त्री केपी शर्मा ओलीले सञ्चारकर्मीसँग कुरा गर्दै माधव नेपालले भनको कुरामा कुनै आपत्ति नभएको बताएका हुन् ।
प्रधानमन्त्री ओलीले नेता माधवकुमार नेपालको असन्तुष्टिलाई ठूलो बनाउन जरुरी नभएको बताए । उनले भने, ‘कवि मनले लयात्मक ढंगले केही भनिहाल्यो भने त्यसैलाई समातेर कुद्नु पर्ने छैन। पुराना गीत सम्झना हुनसक्छ ।’
उनले सरकारले अहिलेसम्म कुनै खराब काम नगरेको दाबी गरेका छन् । ‘ याे सरकार ५ वर्ष चल्छ र अर्को चुनावपछि झन् बलियो भएर आउँछ’ उनले भने ।
उनले भारत र चीन सँगको सम्बन्ध बेग्लै उचाइमा अगाडि बढाइएको जानकारी गराउँदै अमेरिका तथा कोष्टारिका भ्रमण नेपालको हित प्रवर्धनमा फलदायी भएको बताए ।
उनले अमेरिका हुँदै कोस्टारिकाको भ्रमण समेत गरेका छन् । प्रधानमन्त्री ओलीले सान होजेमै शान्ति विश्वविद्यालयबाट प्रदान गरिएको मानार्थ विद्यावारिधिको उपाधि पनि ग्रहण गरेका थिए ।
प्रधानमन्त्री ओलीसँग उनकी धर्मपत्नी राधिका, परराष्ट्रमन्त्री प्रदीपकुमार ज्ञवाली, प्रमुख राजनीतिक सल्लाहकार विष्णुप्रसाद रिमाल, शिष्टाचार महापाल दीपक अधिकारी तथा नेपाल सरकारका अन्य वरिष्ठ अधिकारी रहेका छन्।
