उर्लाबारी, २३ असोज ।
कुलझोडा युवा क्लबले वडादशैं, शुभ दिपावली तथा छठ पर्वको अवसरमा प्रदेशस्तरीय नकआउट फुटबल प्रतियोगिता आयोजना गर्नेभएको छ ।
प्रतियोगिता आगामी कात्तिक १२ देखि १९ गतेसम्म सञ्चालन गरिने आज आयोजित पत्रकार सम्मेलनमा खेल संयोजक कमल फ्याकले जानकारी दिनुभयो ।
उर्लाबारी–८ दुर्गापुरीस्थित अरनिको माध्यमिक विद्यालयको प्राङ्गणमा सञ्चालन गरिने सो प्रतियोगितामा चर्चित आठवटा टिमको सहभागिता रहनेछ । प्रतियोगितामा विजेतालाई नगद दुई लाख तथा उपविजेतालाई एक लाख नगदसहित ट्रफी,मेडल र प्रमाणपत्र प्रदान गरिने आयोजकले जनाएको छ ।
सो प्रतियोगिता सञ्चालनका लागि कमल फ्याकको संयोजकत्वमा सात सदस्यीय खेल उपसमिति गठन गरिएको छ । जसको उपसंयोजकमा सानु तामाङ, सचिवमा भुपेन सेर्मा, कोषाध्यक्षमा दिनेश थापा मगर तथा सदस्यहरुमा मानबहादुर थापा, अमृत लिम्बु र मुकेश धिमाल रहनुभएको छ । आयोजक टिमका सचिव भुपेन शेर्माले खेललाई भब्य रुपमा सन्चालन गर्नका लागि देशविदेशमा रहनुहुने खेलप्रेमी शुभेच्छुकहरुलाई सहयोग पुर्याईदिनुहुन अनुरोध गर्नुभएको छ ।
