काठमाडौं, २५ असोज । नेपाली कांग्रेसको २१ असोजमा बसेको केन्द्रीय कार्यसमिति बैठकले पार्टीको विद्यार्थी भ्रातृसंस्था नेपाल विद्यार्थी संघ (नेविसंघ)मा ३२ बर्षे उमेर हद लगाएपछि माउ पार्टी कांग्रेसमा तरंग पैदा भएको छ ।
नेताहरु दुई ध्रुवमा बाडिएका छन् । पार्टीको संस्थापन पक्षले यो निर्णय उपयुक्त भन्दै बचाउँ गरिरहेको छ भने नेता रामचन्द्र पौडेल पक्षका नेताहरु विपक्षमा देखिएका छन् ।
नेविसंघको विधानमा ३२ बर्षे उमेर हद लगाउने निर्णय केन्द्रिय समितिबाट हुदाँ चार नेताले नोट अफ डिसेन्ट लेखेका थिए । नोट अफ डिसेन्ट लेखेका कृष्ण सिटौला, प्रकाशमान सिंह र अर्जुनरसिंह केसीले २५ बैशाखमा बोलाइएको केन्द्रिय कार्यसमिति बैठक बहिस्कारको तयारी गरेका छन् ।
तर, नेता रामचन्द्र पौडेलले भने कुनै निर्णय लिन सकेका छैनन् । विहिबारका लागि बोलाइएको बैठकमा नेविसंघ र कांग्रेसको विधानका विषयमा छलफल हुने बताइएको छ ।
विहिबारको बैठक बहिस्कार गर्ने या नगर्ने भन्ने विषयमा छलफल गर्न सोमबार बसेको पौडेल समूहको बैठक विना निष्कर्ष सकिएको छ । बैठक बहिस्कार गर्नुुपर्ने सिटौला, प्रकाशमान र अर्जुनरसिंहले राखेको प्रस्तावमा अन्य नेता सहमत नभएपनि बैठक विना निष्कर्ष सकिएको हो । भेलामा नेता डा. रामशरण महतले बैठकमा जानुपर्ने धारणा राखेका थिए ।
कांग्रेस भ्रातृ संगठनले विधान आफैं बनाउँछन् र कांग्रेसको केन्द्रीय समितिले अनुमोदन गरेपछि लागू हुन्छ । नेविसंघको ११ औं महाधिवेशनले १२ औं महाधिवेशनबाट ३२ वर्षे उमेर हद लागू गर्ने निर्णय गरेको थियो ।
तर, नेविसंघको केन्द्रीय समितिले त्यसलाई हटाएर विधान अनुमोदनका लागि कांग्रेस केन्द्रीय कार्यसमितिमा पठायो ।
नेविसंघले पठाएको विधान बैठकमा पेश नै नगरी चोर बाटोबाट अर्को विधान ल्याएको भन्दै पौडेल र सिटौला समूहले विरोध गरेका हुन् । अभियान टाइम्सका साथमा ।