रूपेन्द्र शेर्मा
उर्लाबारी, २५ असोज/मोरङको उर्लाबारी–३ का वडा सदस्य सोमप्रसाद तिम्सिनाले आफूले नगरपालिकाबाट प्राप्त गरेको भत्ता एक स्थानीय विद्यालयलाई दिएका छन् । तिम्सिनाले नगरपालिकाबाट प्राप्त गरेको एक बर्षको आर्थिक सेवा–सुविधा सो विद्यालयलाई हस्तान्तरण गरेका हुन् ।
स्थानीय दुर्गा माध्यमिक विद्यालयलाई बिहीबार एक कार्यक्रमकाबीच तिम्सिनाले एक लाख २५ हजार पाँच सय रुपैयाँ सहयोग प्रदान गरेका छन् । यसरी प्रदान गरिएको रकम विद्यालयको अक्षय कोषमा जम्मा गरिने विद्यालयकी प्रधानध्यापिका शारदा पाण्डेले जानकारी दिइन् ।
सहयोगदाता तिम्सिनाले बिपन्न समुदायको बालबालिकालाई पठनपाठनमा सहयोग पुगोस् भन्ने उद्देश्यले उक्त रकम सहयोग गरेको बताए । साँसद कोषको रकम सामुदायिक विद्यालयमा अध्ययनरत बालबालिकाको हितमा लगानी नगर्नु दुःखद भएको उनले बताए । ‘साँसद कोषको रकम विपन्न समुदायको हितमा भन्दा पहुँचवाला र सम्पन्न वर्गको हितमा विनियोजन हुनेगरेको छ । जुन अत्यन्तै दुःखद हो’, तिम्सिनाले भने ।
यसैबीच सो विद्यालयमा सिभिल सब इन्जिनियरिङको पढाई सञ्चालन गरिएको छ । प्रतिनिधि सभाका सदस्य घनश्याम खतिवडाले उक्त बिषयको पढाई उद्घाटन गरे । १८ महिने उक्त विषयको पढाई यसैबर्षदेखि सञ्चालन गरिएको विद्यालयकी प्रधानध्यापिका पाण्डेले जानकारी दिइन् । सो बिषयमा हाल ४० जना विद्यार्थी अध्ययनरत छन् ।
वि.स.२०३९ सालमा स्थापित सो विद्यालयमा हाल ५०२ जना बालबालिका अध्ययनरत छन् । विगत तीन बर्षदेखि सो विद्यालयले माध्यमिक शिक्षा परीक्षा एसईईमा सहभागिता जनाउँदैआएको पाण्डेले जानकारी दिइन ।
