मेचीनगर । करिब ४ महिना अघि सवारी दुर्घटनामा परी घाइते भएका मेचीनगर ८ इटाभट्टाका चन्द्रबहादुर दर्जीलाई स्थानीय युवाहरुले आर्थिक तथा खाद्यन्न सहयोग गरेका छन् । मजदुरी गरेर परिवारको गुजारा चलाउँदै आएका दर्जीलाई युवा बालकृष्ण ढुङ्गानाको अगुवाईमा ४ हजार मुल्य बराबरको खाद्यन्न र नगद ३ हजार रुपैयाँ सहयोग गरेका छन् । सबैका घर घरमा दशैँ आइरहेका बेला मजदुर दर्जीलाई पनि दशैँ मनाउन पाउन भन्ने उदेश्यका साथ उनीहरुले दर्जीलाई घरैमा पुगेर सहयोग गरेका हुन् । सवारी दुर्घटनामा परेका दर्जीको देब्रे खुट्टामा स्टील लगाएको छ । उनलाई हिडडुल गर्न समेत कठिन हुने गरेको छ । ढुङ्गानाको अगुवाइमा स्थानीय युवाहरु सागर लिम्बू, चन्द्र दाहाल, चन्द्र भट्टराई, रुपसागर अधिकारी, कंचन बराल, कृष्ण श्रेष्ठलगायतले उक्त रकम संगलन गरेर उनलाई सहयोग गरेका हुन् । गरिबको घरमा पनि दशैको अनुभूति होस भन्ने उदेश्यले सहयोग गरेको ढुङ्गानाले बताए ।
