इटहरी । नेपालमै उपचार हुने रोगहरुका लागि पनि नेताहरु सरकारी रकममा विदेश उपचारका लागि जान्छन् भनि आलोचना हुने गर्दछ । नेताहरुको स्वास्थ्य उपचारकै लागि राज्यको ठुलो रकम खर्च हुन्छ ।
यतिखेर प्रदेश १ का मुख्यमन्त्री शेरधन राई उपचारका लागि थाइल्याण्ड जाने भएका छन् । गर्धन र घाँटीको उपचारका लागि मुख्य मन्त्री राई कात्तिक १६ गते थाइल्याण्ड जाँदै छन् । विदेशमा उपचार लागि व्यक्तिगत खर्चमा जान लागे पनि उनको आलोचना भने भएको छ ।
आफ्नो पाटीका शिर्ष नेताको सिको अहिले राईले गर्न लागेका हुन । राईले राज्यकोषको पैसा नभई आफ्नो व्यक्तिगत पैसा खर्च गर्ने दाबी गरेका छन् । तर राईले बिदेशमा गएर उपचार गराउने व्यक्तिगत आर्थिक हैसियत कतिको बनाएका छन् भन्ने पनि प्रश्न उठेको छ ।
भोजपुरबाट सामान्य राजनिति शुरु गरेका राईको कुनै व्यापार व्यवसाय छैन । राई यस अघि सुचना तथा संञ्चार प्रबिधि मन्त्री भइसकेका छन् । उनले सरकारलाई बुझाएको सम्पति विवरणमा पनि भोजपुरमा एउटा जमिन, ८ तोला सुन र केही लाख बैंक ब्यालेन्स छ ।
तर राईले भने उपचारको लागी थाइल्याण्ड जाने खर्च आफ्नो नजिकका इष्टमित्रबाट लिएको बताएका छन् । यता नेपाली चिकित्सकहरुले जस्तो सुकै घाँटीमा देखिएको समस्याको उपचार नेपालमा नै सम्भव भएको बताएका छन् ।
नाक कान घाँटी बिशेषज्ञ डा. प्रकाश रेग्मीका अनुसार मुख्यमन्त्रीमा देखिएको समस्या नेपालमै उपचार गर्न सम्भव भएको बताए । ‘नेपालमा घाँटीमा देखिने रोगको पहिचान र उपचार सम्भव हुन्छ’ उनले भने ‘सर्जरी गर्नुपरेपनि नेपालमा यसको सेवा उपलब्ध छ’ ।
राईको घाँटी हल्लिने समस्या छ । कतिपयले रक्त प्रवाहमा समस्या भनेका छन् भने केहीले घाँटीको हड्डी खिइएको बताएका छन् । तर कुन रोग हो भनेर पहिचान नभएको बताइएको छ । राईले काठमाडौं लगायत केही अस्पतालमा चेकजाँच गराएपनि रोग पत्ता नलागेपछि थाइल्याण्ड जान लागेको सिधा कुरा जनताको कार्यक्रममा बताएका छन् ।
प्रदेश १ को मन्त्रिपरिषदको बैठकले पनि मुख्यमन्त्रीको बैंकक भ्रमण स्वीकृत गरेको छ । स्वास्थ्य उपचार निजी खर्चमा गरिने भन्दै राईले सरकारको एक पैसा पनि नलिने बताएका थिए ।
राईको थाइल्याण्डस्थित बुम्रुनग्राड इन्टरनेशनल हस्पिटलमा चेकजाँच हुनेछ ।
