विराटनगर । भारतको बथनाहादेखि मोरङको विराटनगर महानगरपालिकास्थित बुधनगरसम्म रेल आइपुगेको छ । निर्माण सम्पन्न भएको रेलवे कस्टम यार्ड र भारतीय रेलवे स्टेशन बथनाहातर्फबाट ट्रयाकमा फलाम लिक बिछ्याउँदै ३.३ किलोमिटरसम्म विस्तार र परीक्षण गर्ने क्रममा रेल बुधनगर ल्याइएको हो ।
हालसम्म रेलवेको परीक्षण भइसकेको जोगबनी–विराटनगर निर्माण कम्पनी इरकोनका राजाराम भगतले जानकारी दिए । परीक्षणका क्रममा आइतबार रेलको इन्जिन ल्याइएको हो । अब डिसेम्बर १२ देखि नियमित रुपमा रेल सञ्चालन गरिने उनले बताए । सो मार्गमा चल्ने रेल यात्रुवाहक भने होइन । कच्चा पदार्थ ढुवानीका लागि व्यवसायीहरुले यसको प्रयोग गर्नेछन् । बुधनगरमा रेल आइपुगेपछि स्थानीय हर्षित भएका छन् । रेल आउनु २ घण्टा अगावैदेखि स्थानीय कुरेर बसेका थिए । विराटनगर–१८ का वडाध्यक्ष्य सञ्जय साहले बुधनगरमा रेल आएपछि सबैलाई फाइदा पुग्ने बताए । नेपाल र भारत सरकारबीच सन् २०१० मा विभिन्न ५ स्थानमा रेलमार्ग विस्तार गर्ने समझदारीपत्रमा हस्ताक्षर भएको थियो ।
जसअनुसार यसको सम्पूर्ण खर्च भारत सरकारले बेहोर्ने र नेपालतर्फको जमिनको मुआब्जा नेपाल सरकारले ब्यहोर्ने समझदारी भएको थियो । समझदारीअनुसार सन् २०१७ मै नेपाली भूमिमा रेल ल्याई पुर्याउनुपर्ने भएपनि विराटनगर–जोगबनी रेलमार्ग निर्माणमा भएको जग्गा मुआब्जा विवादले असर गरेको थियो । बथनाहा–कटहरी १८ किलोमिटर दूरीको रेलमार्गमध्ये बथनाहा–बुधनगरको ८ किलोमिटर रेलमार्ग निर्माण भएपछि रेलको परीक्षण गरिएको हो ।
