देबु बानियाँ
जनकपुर । जनकपुरमा हुने नेपाल जेसीजको ४५ औँ राष्ट्रिय महाधिवेशनको तयारी भइरहेको अवस्थामा स्थानीय सरकारको रुपमा रहेको जनकपुर उप महानगरपालिकाको समेत उत्तिकै सक्रियता रहेको छ । आउँदो पुष ७ गतेबाट हुने ४ दिने महाधिवेशन सम्पन्न गर्ने स्थानमा काम भइरहेको छ । सोही ठाउँको अनुगमनका लागि जनकपुर उपमहानगरका नगर प्रमुख लालकिशोर शाहले शनिवार महाधिवशेन निर्माण स्थलको स्थलगत अनुगमन गर्नु भयो । साथै उहाँले ३ घण्टा भन्दा धेरै निर्माणस्थलमा रहेर आवश्यक निर्देशन समेत दिनु भएको आतिथ्यता शाखा जनकपुर जेसीजका अध्यक्ष जितेन्द्र महासेठले बताउनु भयो ।
अनुगमनका क्रममा मेयर शाहले जनकपुरका लागि यो महाधिवेशन ऐतिहासिक भएको बताउँदै जनकपुरको इतिहासलाई कायम राख्न उपमहानगरपालिकाले कुनै कसुर बाँकी नराख्ने बताउनु भयो । साथै उहाँले देशभरका जेसीजकर्मीको स्वागतका लागि सिंगो जनकपुर उपमहानगरपालिका तयार रहेको बताउँदै महाधिवेशन सम्पन्न गर्न नगरपालिकाको समेत उत्तिकै दायित्व रहेको बताउनु भयो । साथै उहाँलेृ महाधिवेशनका लागि अहिलेसम्म भएका गतिविधिका बारेमा समेत आयोजकसँग जानकारी तथा विभिन्न जिज्ञासा राख्नु भएको थियो । उहाँले थप सामाग्री आवश्यक परेमा जानकारी गराउन आयोजकलाई आग्रह गर्नु भएको थियो ।
महाधिवेशन निर्माण स्थलका लागि जनकपुर उपमहानगरपालिकाले १० वटा ट्याक्टर, ३ वटा स्काभेटर, जेसीभीलगायतका निर्माण उपकरणहरु उपलब्ध गराएर धमाधम काम गरिरहेको छ । उक्त्त कार्यको बारेमा अनुगमन गर्नका लागि मेयर शाह आफै निर्माण स्थल आउनु भएको महाधिवेशनका उप निर्देशक मनिष रमन शाहले् बताउनु भयो ।
उक्त महाधिवशेन स्थलमा मंसिर ५ गतेबाट टेन्टको काम गरिने उप निर्देशक शाहले जानकारी दिनु भयो ।
