इटहरी । सुनसरी दुहबीका फिदा हुसेनलाई ढुकेर गोली हानिएको प्रारम्भिक अनुसन्धानबाट खुलेको छ । गोली चलाउने (सुटर) एक जना बाईकमा सवार थिए ।
श्रीमती आशा हुसेन र फिदा घटनाको दिन मर्निक वाकमा निस्केको समयमा बिहानैदेखि उनलाई इटा उघोग अगाडी ढुकेर बसेको प्रहरीको अनुसन्धानबाट खुलेको हो । श्रीमती आशाको बयानको क्रममा पनि सुनसरी मोरङ सिञ्चाई आयोजनाको शाखा नहरको पुल नजिक एक्सरसाइज गर्दै ढुकेर बसेको व्यक्तिले गोली हानेर भागेको बताइन ।
हुसेनले श्रीमतीलाई घर पठाएर उघोग तर्फ जाने क्रममा ति व्यक्तिले दुई राउण्ड गोली फायर गरेका थिए । गोली हुसेनको मुटु र कोखामा लागेको थियो । शुरुमा पछाडीबाट एक राउण्ड फायर गरे पछि हुसेन ढल्न खोज्दै गर्दा अगाडीबाट अर्काे राउण्ड फायर भएको प्रहरी स्रोतले बताएको छ ।
गोली फायर गरे लगतै ति व्यक्ति बाईक चलाएरै नहरको बाटो हुँदै उत्तरतर्फ भागेका थिए । गोली चलाउने व्यक्ति पातालो शरिर र कालो वर्णको भएको अनुसन्धानबाट खुलेको छ ।
घटनाक्रमले हुसेनलाई योजनाबद्ध रुपमा गोली हानिएको प्रहरी स्रोतले बताएको छ । यता प्रहरीले घटनाको अनुसन्धानको लागी भन्दै ७ जनालाई नियन्त्रणमा लिएको छ ।
