केपी शर्मा ओली नेतृत्वमा दुई तिहाई मत सहित सरकार बनेको ९ महिना पुग्न लाग्यो, सरकारको काम गराई कस्तो पाउनु भएको छ ?
वर्तमान सरकारले निन्तरतामा क्रमभंगता गर्न सकेको देखिएन । यो सरकार निरन्तरताको लागि मात्रै बनेको थिएन । प्रधानमन्त्री केपी शर्मा ओली सफल प्रधानमन्त्री हो । तर, उहाँको टिममा रहेका मन्त्रीहरुबीच टिम स्पिरिट देखिएन् । जसका कारण सरकारले आफ्नो योजना अनुरुप काम गर्न सकिरहेको छैन । सरकारले जनताका चाहना र आकांक्षा पूरा गर्ने गरि काम गर्न नसकेको स्वीकार गर्नैपर्छ । अब जनताका चाहना अनुसार काम गर्नुपर्छ । काममा ब्रेक थु हुनुपर्छ ।
वर्तमान सरकार ईतिहाँसकै शक्तिशाली सरकार भएकाले निरन्तरतामा क्रमभंगता हुनुपर्दथ्यो भन्ने चाहना पार्टीको समेत थियो । तर, अहिलेसम्म त्यो देखिएन । यो सरकार विगतकै जस्तो निरन्तरताको लागि भयो । जनताले त सुशासन, भ्रष्टाचारलाई कारबाही गर्ने कुरामा क्रमभंगता खोजेका थिए । जनताले चाहेजस्तो सरकारले ब्रेक थ्रु गर्न नसकेकै हो, अव सरकारले आफ्नो काम गराईको शैली सुधार्नु पर्छ ।
सरकारले काम गर्न नसकेपनि पार्टीमा सरकारको समिक्षा भएको देखिएन नी ?
पार्टीका केही शीर्ष नेताहरु विदेश भ्रमणमा हुनुहुन्छ । पार्टी अध्यक्षसमेत रहनु भएका प्रधानमन्त्री ओली अस्वस्थ भएकोले सचिवालय र स्थायी समिति बैठक बस्न सकेका छैनन् । अब बस्ने सचिवालय बैठकमा सरकारको बारेमा पनि समिक्षा गर्छ । लामो समयदेखि सरकारको समिक्षा गर्न बैठक बोलाउने तयारी भएपनि नेताहरुको समय नमिल्दा त्यो हुन सकेको र्छैन ।
नौ महिनामा सरकारले राम्रा काम यो यो गर्यो भनेर भन्न लायक के के देख्नुहुन्छ ?
सरकार रणनीतिक महत्वका काममा पूर्ण सफल भएको छ । निर्माण भएपछि सरकारले अन्तर्राष्ट्रिय सम्बन्धलाई उचाई प्रदान गर्न, द्धिपक्षीय सम्बन्धलाई गुणात्मक बनाउन र ल्याण्ड-लक्डबाट ल्याण्ड-लिंकतर्फ मुलुकलाई अघि बढाउन सफल भएको छ । जुन कार्य रणनीतिक महत्वका कार्य थिए ।
प्रधानमन्त्री ओली संयुक्त राष्ट्रसंघको महासभामा गएर मुलुकको राष्ट्रिय स्वाधिनता र स्वभिमानको विषयमा शीर उठाउने काम गर्नु भएको छ, जसले विश्वमा सम्पूर्ण नेपालीलाई शीर ठाडो पारेर भन्न सक्ने अवस्था सृजना भएको छ । प्रधानमन्त्री ओलीसँग अहिलेपनि राष्ट्रवादी अडान कायमै छ भन्ने मेरो जबरजस्त धारणा छ । सरकारले समयमै मौलिक हकसम्बन्धी कानुन ल्याउन सकेको छ । जसले मुलुकमा संवैधानिक संकट टार्ने काम गरेको छ ।
तर, हटाउछु भनेर घोषणा गरेको सिण्डिकेट त हटेन नि, होइन ?
सरकारले कानुनी रुपमा सिण्डिकेट अन्त्य गरिसकेको छ । तर, मन्त्रालयहरुबीच समन्वय नहुँदा व्यवहारमा जनताले त्यसको अनुभुति गर्न नपाएको सत्य हो । मन्त्रीहरुबीच टिम-स्पिरिट देखिएको छैन । प्रधानमन्त्रीको स्पिरिट मन्त्रीहरुमा देखिएको भए अहिलेसम्म धेरै नया काम भइसक्थे । अब समिक्षा गर्ने बेला भएको छ । सिण्डिकेट अन्त्यको लागि काम भएको छ । तर, व्यवस्थापनमा केही समस्या देखिदा व्यवहारमा जनताले अनुभूत गर्न पाएका छैनन् ।
जनताले सरकारसंग भाषण खोजेका कि परिवर्तको व्यवहारिक अनुभूति ?
जनताले सरकारबाट भाषण खोजेका होइनन, ‘एक्शन’ नै खोजेका हुन । तर, एक्शन चने जसरी देखिएको छैन । जनतालाई सपना देखाउने काम पूरा भइसकेको छ । अब ‘एक्शन’ गरेर नै देखाउनु पर्ने हो । अब बस्ने स्थायी समिति बैठकमा सरकारको बिहंगम समिक्षा हुन्छ ।
सरकारले रणनीतिक महत्वको काम सफलतापूर्वक सम्पन्न गरेपनि जनतालाई सेवा दिने काममा ढिलाई भएको म स्वीकार्छु । अब सरकारले अल्पकालिन, मध्यकालिन र दीर्घकालिन योजनाहरुको ‘सेरिज’ बनाउनुपर्छ । र, त्यही सेरिज अनुसार काम गर्नुपर्छ ।
भाषण मात्रै गर्ने काम नगर्ने गरेपछि त यो सरकारको पनि विकल्प खोज्न जनता बाध्य होलान नि ?
वर्तमान सरकारको विकल्प अहिले नै जनतासंग छैन् । तत्काल खोज्ने प्रयत्न गर्न पनि हुदैन । मुलुकमा राजनीतिक संक्रमणकालको त समापन भएको छ । तर, व्यवहारिक संक्रमण बाँकी नै छ । तसर्थ यस संक्रमणलाई सबै मिलेर हल गर्न लाग्नु पर्छ । यसको लागि मुख्य राजनीतिक दलहरु बीच बढि भन्दा बढि छलफल र सम्वादको आवस्कयकता पर्छ ।
जनस्तरबाट उठेका सरकारको काम बारेका आलोचनालाई पनि वेवास्ता गरेपछि सरकारको विरुद्धमा जनता लाग्न सुरु गरिसके, यस विषयमा यहाँको भनाई के छ ?
सरकारका कामकारबाहीका सवालमा जनताको तहबाट उठेका सकारात्मक आलोचनाहरुलाई सुझावका रुपमा लिनु पर्छ । र ति सुझावलाई कसरी व्यवहारमा कार्यान्वयन गर्ने भनेर सरकारले योजना बुन्न सक्नु पर्दछ । जनताका सकारात्मक आलोचना र गुनासाहरुलाई सरकारले एक÷एक रुपमा सम्बोधन गर्नुपर्छ ।
यदि ति आलोचना र गुनास पुरा गर्न नसक्ने हो भने त जन निर्वाचित सरकार नै भएन नि । जनताले यही सरकारबाट ठूलो आशा गरेका छन् । उनीहरुको त्यो आशालाई निरासामा परिणात हुन दिनु हुदैन । अहिले जनतासंग कम्युनिष्ट सरकारको विकल्प छैन, त्यसैले उनीहरुलाई कसरी खुसी बनाउने भन्ने कार्य सरकारको हो ।
जनताका सरकारसँग भएका ठूला आशा र अपेक्षा पुरा गर्नका लागि सरकारसँग अझै समय र शक्ति छ । वर्तमान प्रधानमन्त्री ओली सफल प्रधानमन्त्री हुनुहुन्छ । त्यसैले पुरा गर्नुहुन्छ भन्ने विश्वास हामीले गरौ ।
पार्टी एकताको कामले पनि गति लिन सकेको देखिन्न नि ?
पार्टी एकताको काम प्रगतितर्फ उन्मुख छ । औपचारिक रुपमा भन्दापनि एकताका कार्यहरु आन्तरिक रुपमा मिलाउने कार्य भइरहेका छन् । अहिलेसम्म लगभग ८० प्रतिशत पार्टी एकताको काम सकिएको छ । बाहिर सार्वजनिक हुन मात्रै बाँकी हो ।
तपाईले त्यति भनेपनि विभिन्न स्थानमा दुई समिति बनेका पार्टी मिल्नु अघिका एमाले र माओवादी पार्टीका नाममा गतिविधि सञ्चालन भइरहेका समाचारहरु त आइरहेका छन् नि ?
केहि स्थानमा त्यस्तो रहेको सूचना पार्टी केन्द्रिय कार्यालयमा पनि आएका छन् । हामीले पूर्ण रुपमा जिल्ला तहसम्म एकिकरण गरि नसकेकाले त्यस्तो हुनु स्वभाविक हो । किनकि पार्टी एकिकरण हुन अघिसम्म एमाले र माओवादी दुबैका वडास्तरसम्म समिति थिए ।
ति समितिले एकिकरणको प्रक्रिया पुरा नहुँदासम्म आ आफ्नो तरिकाले काम गर्नुलाई स्वभाविक रुपमा लिनु पनि पर्छ । आम नागरिकका समस्यालाई समाधान गर्न उनीहरु क्रियाशील हुनु पनि पर्छ । एकिकरणको प्रक्रिया पूर्ण रुपमा पुरा भएपछि यस्ता समस्या आफै समाधान भएर जान्छन् ।
अन्तमा पार्टीको सम्पूर्ण एकिकरणको प्रक्रिया कहिलेसम्म सम्पन्न हुन्छ ?
समय नै तोकेर यो दिनमा भइसक्छ भन्न त सकिन्न । विभिन्न स्तरमा पार्टी एकिकरणका लागि बनाइएका कार्यदलहरुले काम गरिरहेका छन् । ति कार्यदलहरुले दिएको सुझावका आधारमा पार्टीले निर्णय गरेर एकिकरण हुने हो । त्यो कार्य धमाधम चलिरहेकाले दुई महिनासम्म सबै काम पुरा भइसक्छ कि भन्ने अनुमान हाम्रो छ । अभियान टाइम्सका साथमा ।
