काठमाडौं । बार्सिलोनाका स्टार लियोनल मेस्सीले एउटै क्लबको लागि सबैभन्दा बढि गोल गर्ने किर्तिमानमा युभेन्टसका स्टार फुटबलर क्रिश्टीयानो रोनाल्डोेलाई उछिन्दै आफ्नो नाम दर्ता गराएका छन् ।
मेस्सीले च्याम्पीयन्स लिग अन्तर्गत पिएसभी इन्डहोभेन विरुद्धको खेलमा ६१ औं मिनेटमा गोल गर्दै च्याम्पीयन्स लिगमा बार्सिलानाको लागि १०६ औं गोल गरेका थिए । यसअघि रोनाल्डोले रियल मेड्रिडको लागि च्याम्पीयन्स लिगमा १०५ गोल गरेका थिए ।
हाल रियल मेड्रिडबाट युभेन्टस गएका रोनाल्डोको पुरानै क्लबमा फर्किने सम्भावना अति न्यून छ । यस्तोमा यो किर्तिमान मेस्सीकै नाममा लामै समय रहने पक्का भएको छ ।
यस किर्तिमानमा पछि परेपनि च्याम्पीयन्स लिगको इतिहास १२१ गोल गर्दै सर्वाधिक गोल गर्ने किर्तिमानमा रोनाल्डोकै नाममा रहेको छ ।
गोल मेसिन को उपनामले परिचित रोनाल्डो र मेस्सी आउनुअघि स्पेनका स्टार राउलले रियल मेड्रिड र स्काल्कको लागि खेल्ने क्रममा कुल ७१ गोल गर्दै सर्वाधिक च्यापीयन्स लिगमा सर्वाधिक गोलकर्ताको किर्तिमान राखेका थिए ।
रोनाल्डोको किर्तिमान भंग गर्ने मेस्सीको उक्त गोल यस सिजनको १५ औं गोल हो । यो सँगै उनले १३ वटा सिजनमा १५ वा सो भन्दा बढि गोल गर्ने किर्तिमान पनि राखे ।
मेस्सीकै असिस्टमा सोही खेलमा जेरार्ड पिकले अर्को गोल थपेका थिए । बार्सिलोनाले खेल २–१ ले आफ्नो पक्षमा पारेको थियो ।
बार्सिलोनाले अब ला लिगा अन्तर्गत सेभियासँग खेल्ने तालिका रहेको छ । त्यसपछि आगामी डिसेम्बर ११ मा च्यापीयन्स लिगको समुह चरणको अन्तिम खेलमा टोटनह्यामको सामना गर्नेछ ।
