काठमाडौ,१८ मंसिर । पार्टीको प्रस्तावित विधान मस्यौदामाथि छलफल गर्न प्रमुख प्रतिपक्षी दल नेपाली कांग्रेस केन्द्रीय कार्यसमिति बैठक आजपनि बस्दैछ । पार्टी कार्यालय सानेपामा ११ बजेपछि बस्ने बैठकमा प्रस्तावित विधान मस्यौदामाथी केन्द्रीय सदस्यहरुले आ–आफ्नो धारणा राख्नेक्रम जारी रहने पार्टी कार्यालयका मुख्यसचिव कृष्णप्रसाद पौडेलले जानकारी दिएका छन् ।
कांग्रेसले पार्टीको विधानलाई सङ्घीय संरचनाअनुसार परिमार्जित गर्न गठित महामन्त्री पूर्णबहादुर खड्काको संयोजकत्वको समितिले मङ्सिर ९ गतेको केन्द्रीय समिति बैठकमा विधान संशोधनको मस्यौदा प्रस्तुत गरेका थिए ।
मङ्सिर १३ गतेदेखि जारी पार्टीको केन्द्रीय समिति बैठकमा उक्त मस्यौदामाथि छलफल चलिरहेको छ । सभापति शेरबहादुर देउवाको सभापतित्वमा सोमबार बसेको बैठकमा केन्द्रीय सदस्य बलबहादुर केसी, डा.नारायण खड्का, उमाकान्त चौधरी, महालक्ष्मी उपाध्याय, डा. शेखर कोइराला, जीवनबहादुर शाही, रत्ना शेरचन र किरण यादवले आ–आफ्नो धारणा राखेका थिए ।