काठमाडौं – ठूल्ठूला गफ गरेर जनताका लागि काम गर्ने भन्दै चुनाव जितेका कम्युनिस्टहरूले सिन्को भाँच्न नसकेपछि देशभर आलोचना भइरहेको छ ।
जनअपेक्षा पूरा गर्न नसकेको भन्दै सत्ताधारी नेपाल कम्युनिस्ट पार्टी (नेकपा) भित्र नै आलोचना भइरहेका बेला प्रधानमन्त्री केपी शर्मा ओलीले भने होटलमा भोतभतेर गरेका छन् ।
देशभरका कम्युनिस्टहरू भेला भएर काठमाडौंको खर्चिलो होटलमा भोजभतेरमा मस्त भएका छन् । प्रधानमन्त्री केपी शर्मा ओलीले सात वटै प्रदेशका मुख्यमन्त्रीलाई काठमाडौं बोलाएर होटलमा भोज दिइरहेका छन् ।
राजधानीको होटल याक एण्ड यतिमा प्रधानमन्त्री ओलीले मुख्यमन्त्रीहरुका लागि रात्रीभोजको आयोजना गरेका हुन् ।
प्रधानमन्त्री ओलीले आयोजना गरेको रात्रीभोजमा सातवटै प्रदेशका मुख्यमन्त्रीका अतिरिक्त नेता कार्यकर्ताको उपस्थिति रहेको बताइएको छ ।
आईतबारदेखि राजधानीमा अन्तरप्रदेश परिषदको बैठक सुरु भएको छ । बैठकमा सहभागी हुन राजधानी आएका मुख्यमन्त्रीका लागि प्रधानमन्त्री ओलीले रात्रीभोज दिएका हुन् ।
प्रधानमन्त्री निवास वालुवाटारमै रात्रीभोज गर्न सकिने व्यवस्था हुँदाहुँदै प्रधानमन्त्री ओलीले सरकारी बजेट स्वाहा हुने गरी खर्चिलो होटलमा भोजभतेर गरिरहेका छन् । जनतालाई राहत दिन, बृद्धभत्ता बढाउन बजेट नभएको बहाना गर्ने प्रधानमन्त्री ओलीले मोजमस्तीमा सरकारी बजेट उडाइरहेका छन् ।
