काठमाडौं । नुवाकोट दूर्घटनामा अहिलेसम्म १६ जनाको मृत शरीर भेटिएको प्रहरीले पुष्टि गरेको छ । जिल्ला प्रहरी कार्यालय नुवाकोटका डिएसपी भीम भट्टराइले साँझ सवा ७ बजेसम्म १६ जनाको मृत शरीर भेटिएको पुष्टि गरे । नुवाकोटको दुप्चेश्वर गाउँपालिकाको घ्याङफेदीमा शुक्रबार भएको दूर्घटनामा ४० जना यात्रु सवार रहेको जिल्ला प्रशासन कार्यालय नुवाकोटका प्रमुख जिल्ला अधिकारी उद्धव बहादुर थापाले जानकारी दिए ।
उनले ठूलो संख्यामा यात्रुहरु हताहत भएको भन्ने जानकारी आएको भएपनि कति यात्रुको ज्यान गयो भन्नेबारे यकीन विवरण नआईसकेको बताए ।
‘घटनास्थलमा प्रहरी जाँदैछ । प्रहरी पुगेर विस्तृत जानकारी दिएपछि मात्रै मैले मृतकको बारेमा बताउन सक्छु ।’ प्रजिअ थापाले भने ‘४० जना जति यात्रु बोकेर जाँदै गरेको मिनिबस दूर्घटना भएको भन्ने जानकारी आएको छ ।’
सिसिपु जाँदै गरेको मिनिट्रक घ्याङडाँडाको भीरबाट करिब ४०० मिटर तल खसेको जिल्ला प्रहरी कार्यालय नुवाकोटले जानकारी दिएको छ । सवार यात्रुहरु शिखरबेसीस्थित घ्यावामा गएर फर्किँदै थिए ।
