झिलझिले, पुस १ । तीन साताअघि झापाको शिवसताक्षी नगरपालिका-७ स्थित लालझोडाका लक्ष्मण खनालसहित एकै घरका चारजनाको ज्यान जाने गरी भएको आगलागी घटनाको सत्यतथ्य छानबिन गर्न माग गर्दै स्थानीय तथा मृतकका आफन्तले प्रशासनसँग माग गरेका छन् ।
घटनाको छानबिन गरी दोषीलाई कडाभन्दा कडा कारबाही गर्न माग गर्दै स्थानीयसहित पीडित परिवारले झिलझिलेस्थित इलाका प्रहरी कार्यालयमा पुगेर सो घटनाको सूक्ष्म रुपमा अनुसन्धान गर्न स्थानीय प्रशासनको ध्यानाकर्षण गराएका हुन् ।
गत मंसिर ९ गते राति १० बजेतिर खनालको घरमा अचानक आगलागी हुँदा उनीसहित २८ वर्षीया श्रीमती राधिका खनाल, ४ वर्षीया छोरी चन्द्रा र पाँच महिनाका छोरा टिकाराम खनालको मृत्यु भएको थियो । रातको समयमा सो घटना सुनियोजित भएको र यतिका दिन बितिसक्दा पनि घटनाका विषयमा प्रहरीले चित्तबुझो अनुसन्धान नगरेकोमा मृतकका बुबा कृष्ण खनालले गुनासो गरे ।
एकै परिवारका चारजनाको ज्यानै जाने गरी भएको आगलागी घटनाको विस्तृत रुपमा सत्यतथ्य बाहिर आउने गरी छानबिन गर्नुपर्ने शिवसताक्षी नगरपालिका वडा नम्बर १ वडाअध्यक्ष सुवास राईले बताए । झिलझिले प्रहरीले पनि घटनाको सूक्ष्म ढङ्गबाट अनुसन्धान गरिरहेको प्रहरी निरीक्षक कैलाश राईले बताएका छन् ।
