३ पुष २०७५,
मंगलवार तुलसीपुर: नेपाल कम्युनिस्ट पार्टी (क्रान्तिकारी माओवादी) का महासचिव मोहन बैद्य ‘किरण’ले विप्लव नेतृत्वको नेपाल कम्युनिस्ट पार्टीसँग एकताको लागि छलफल भैरहेको बताएका छन् । नेपालमा सच्चा कम्युनिस्ट पार्टी आवश्यक भएकोले त्यसको निर्माण अभियानमा आफू लागेको नेता बैद्यले बताए ।
पार्टी एकताका लागि विप्लव, गोपाल किराँती, मोहनविक्रमले नेतृत्व गरेको पार्टीहरुसँग छलफल भइरहेको र छिट्टै निष्कर्षमा पुग्ने उनले दाबी गरेका छन् । ‘कुराकानी भइरहेको छ, टुट्न केही सजिलो भए पनि एकता गर्न केही कठिनाइ हुँदो रहेछ,’ उनले भने, ‘तर एकपटक सच्चा कम्युनिस्टहरु एक हुन्छौँ भनेर लागेका छौँ ।’
गत बर्ष नेकपा एमाले र नेकपा माओवादी केन्द्रको बीचमा पार्टी एकता भएपछि नेपालको संविधान निर्माण प्रक्रियामा बाहिर रहेका कम्युनिस्ट पार्टीहरुलाई एकता गर्न दबाब बढेको छ । केही समय यता बैद्य, विप्लव र गोपाल किरातीको बीचमा पार्टी एकता गर्ने विषयमा निरन्तर छलफल भईरहेको बताईए पनि ठोस प्रगती हुन सकेको छैन । पार्टी एकता हुन नसके पनि यी तीन पार्टीहरुले विभिन्न बिषयमा कार्यगत एकता गरिरहेका छन् ।
