धुलावारी । मेची उद्योग वाणिज्य संघ मेचीनगर–१० धुलावारीको १६ औँ वार्षिक साधारण सभा सोमवार सम्पन्न भएको छ । अतिथि सदन धुलावारीमा आयोजित साधारण सभामा आर्थिक पत्रकारिता पुरस्कारबाट नागरिक दैनिकका प्रदेश नम्बर १ का सम्पादक राजु अधिकारीलाई सम्मान गरिएको छ । उनलाई कार्यक्रमका प्रमुख अतिथि मेचीनगर नगरपालिकाका मेयर विमल आचार्यले नगद १५ हजार दोसल्ला र सम्मान पत्रद्धारा सम्मान गरेका छन् । यसैगरी, उत्कृष्ट कर्मचारीमा तेजबहादुर गिरीलाई नगद ११ हजारसहित सम्मान गरिएको छ । सोही अवसरमा गत वर्ष आगलागी भएका मेचीनगर १० का व्यवसायी कुमार तामाङलाई राहत स्वरुप नगद ५१ हजार प्रदान गरिएको संघका निर्देशक गोपालकुमार बस्नेतले बताए ।
संघका अध्यक्ष पंकज विक्रम नेम्बाङको सभापतित्वमा सम्पन्न कार्यक्रममा प्रमुख अतिथि मेयर विमल आचार्य, उप मेयर मिना उप्रेती, संघका संस्थापक अध्यक्ष पन्नालाल जैन, उद्योग वाणिज्य संघका केन्द्रीय सदस्य उमेश डालमिया, पत्रकार महासंघ झापाका अध्यक्ष तारामणि सापकोटा, नेपाली कांग्रेसका क्षेत्रीय सभापति मणिकुमार उप्रेती, नेकपाका जिल्ला सदस्य डिल्लीराम घिमिरे, राप्रपा नेपालका रमेश दाहाललगायतले बोलेका थिए । संघका अध्यक्ष नेम्बाङले स्वागत सहित प्रतिवेदन पेश गरेको कार्यक्रमको सञ्चालन महासचिव ऋषी निरौला र धन्यवाद उपाध्यक्ष धुव्र कनालले गरेका थिए । चुनवाी वर्षको रुपमा रहेको यस संघको आगामी पुष २८ गते निर्वाचन हुनेछ ।
