धरान, २ माघ । आठ दिनदेखि अनसनरत डा.गोविन्द केसीको उपचारका लागि भेन्टिलेटरसहित विशेषज्ञ चिकित्सकको टोली इलाम प्रस्थान गरेको छ ।
धरानस्थित बीपी कोइराला स्वास्थ्य विज्ञान प्रतिष्ठानबाट भेन्टिलेटरसहित विशेषज्ञ चिकित्सकको टोली इलाम प्रस्थान गरेको हो । उपप्रधान एवं स्वास्थ्यमन्त्री उपेन्द्र यादवको निर्देशनमा विशेषज्ञ टोली इलाम गएको जनाएको छ ।
आठ दिनदेखि अनसनरत डा.केसीको स्वास्थ्य अवस्था जटिल बन्दै गएको छ । उनको इलामस्थित जिल्ला अस्पतालमा सारिएको छ । उनलाई आइसीयूमा राख्नु पर्ने चिकित्सकहरुले बताएका छन् । इलाम जिल्ला अस्पतालमा भने आईसीयू छैन ।
त्यसैले चिकित्सकको टोली आवश्यक उपकरणसहित बुधबार दिउसो धरानबाट इलाम प्रस्थान गरेको हो ।
डा. विकास शाहको नेतृत्वमा कार्डियोलोजी विभागका डा. प्रशान्त शाह, इमर्जेन्सी विभागका डा. अजय यादव, मेडिसिन आईसीयूका डा. सविन भण्डारीसहित ल्याव टेक्नीसियन, नर्ससहितको टोली एम्बुलेन्समा इलाम लागेको हो । टोलील पोर्टेवल भेन्टिलेटर, इसिजी, एडीवी मेसिन, पल्सअक्सिमेट्री, आकस्मिक उपचारमा चाहिने औषधिलगायतका सामाग्री बोकेको छ ।
डा.केसीको फोक्सोमा समस्या देखिएको छ । त्यस्तै, मुटुको गति कम हुँदै गएको छ भने रोगसँग लड्न क्षमता पनि कम भएको जनाएको छ ।
