काठमाडौं । वैदेशिक रोजगारीका लागि नेपाली कामदार जापान पठाउने विषयमा बुधबार नेपाली र जापानी प्रतिनिधि मण्डलबीच औपचारीक छलफल भएको छ ।
छलफलका क्रममा नेपाली कामदारहरुलाई वैदेशिक रोजगारका लागि जापानमा पारदर्शी र प्रतिस्पर्धी ढंगबाट बठाउने विषयमा कुराकानी भएको उच्च स्रोतले जानकारी दिएको छ । नेपाली कामदारलाई कसरी, कुन विधिबाट पठाउने भन्ने विषयमा समेत छलफल भएको छ ।
छलफलका क्रममा जापानको अध्यागमन सम्बन्धी संशोधित कानुनी व्यबस्थाअनुसार विदेशी श्रमिकको व्यबस्थापन गर्ने सम्बन्धमा जापान सरकारबाट जारी भएका नयाँ कानुनी प्रावधान जापानी पक्षबाट जानकारी गराइएको थियो ।
जापान र नेपाली प्रतिनीधिबीच नेपाली कामदारहरु व्यबस्थित, सुरक्षित र मर्यादित रुपमा पठाउने सन्दर्भमा पारस्पारिक हित प्रवद्र्धन हुने गरी समझदारी कायम गर्न विविध आयाममा छलफल भएको श्रम, रोजगार तथा सामाजिक सुरक्षा मन्त्रालयले जानकारी दिएको छ ।
नेपाल सरकारले नेपाली कामदारहरु द्वीपक्षीय सम्झौता विश्वव्यापी मान्यताअनुसार लैजान विशेष जोड दिएको बताइएको छ ।
श्रम प्रवक्ता नारायण रेग्मीले जापान र नेपालका प्रतिनिधिबीच नेपाली कामदार सुरक्षित, व्यबस्थित र मर्यादित ढंगबाट पठाउन छलफल भएको र यसबारे थप विस्तृत छलफल गरिने बताए ।
उच्च स्तरको समझदारी गरी छिट्टै नेपाली कामदारहरु नयाँ व्यबस्था अनुरुप पठाउन छलफल गरिने प्रवक्ता रेग्मीको भनाई छ । दुवै देशले यसबारे गृहकार्य गर्ने सहमति भइसकेको मन्त्रालयले जानकारी दिएको छ ।
जस अन्र्तगत नेपाली कामदारहरुको सीप र अनुभवलाई प्राथमिकता दिई दुवै देशको उद्यमशीलतालाई विकास गर्न सहयोग पुुर्याउने बारे थप छलफल हुने सहमति भएको हो ।
