काठमाडौं । आफूसंग केपी शर्मा ओली नेतृत्वको सरकारले गरेको सहमति अनुसार नै चिकित्सा शिक्षा विधेयक ल्याउन माग गर्दै आमरण अनसनमा रहेका सत्याग्रही डा गोविन्द केसीको स्वास्थ्य थप कमजोर भएको छ ।
१६ औं दिनदेखि अनसनरत डा केसीलाई फेरि कुनै पनि समय आइसीयुमा लगेर उपचार गराउनु पर्ने अवस्था आउन सक्ने उपचारमा संलग्न चिकित्सकहरुले बताएका छन् ।
डा केसी पुस २५ गतेदेखि आमरण अनसनमा छन् ।
सरकारी पक्षले सुनकै छैन
१६ दिनसम्म सरकारले डा केसीबारे जानकारी नै नभएझैं गरिरहेको छ । डा केसी आमरण अनसन नबसेझै गरिरहेको छ ।
सरकारी पक्षले वार्ताका लागि कुनै पहल गरेको छैन । आरोप प्रत्यारोपमात्र गरिरहेको छ ।
माग पूरा भइसकेको भन्दै खुशीयाली मनाउने बेलामा अनसन बस्नु राम्रो नहुने भन्दै डा केसीले गलत गरेको सरकारी प्रतिनिधिहरुले भन्दै आएका छन् ।
पाँच प्रतिशत नै डा केसीको मागको मुटु हो – वरिष्ठ अधिवक्ता सुरेन्द्र भण्डारी
सरकारले डा गोविन्द केसीका मागलाई पूरा गर्नुपर्छ । १५ औं सत्याग्रहमा सरकारले आफैले गरेका सहमतिलाई पालना गर्नुपर्छ ।
निकास निकाल्नुपर्नेमा सरकारका केही मान्छेहरु डा केसी विरुद्ध उत्रिरहेका छन् । सबै माग पूरा भएका छन् भन्नु भ्रम छर्नुमात्र हो ।
काठमाडौं बाहिर सम्बन्धन दिने सम्बन्धमा डा केसीको सहमति विरुद्ध विधेयक ल्याउन खोजिँदैछ । सम्झौता विरुद्ध छ । सम्बन्धन दिन ऐन लागु नहुने भन्ने छ । स्वार्थनिहीत छ ।
दम्भले मुलुक चलाउने कि उत्तरदायी सरकार भएर मुलुक चलाउने ? सहमति एउटा गर्ने र सरकार अर्कै तरिकाले चलाउने पनि कहीं उत्तरदायी हुन्छ ?
एउटा मानिसको मुटु निकालेपछि शरीर त छ नि भनेर हुन्छ र ? उहाँले मुख्य कुरा नै हटाइदिनु भएको छ ।
९५ प्रतिशत माग पूरा भयो भनेर भन्नु नै गलत हो । पाँच प्रतिशत नै मुटु हो डा गोविन्द केसीको ।
जहाँबाट उभियो त्यहींबाट विधेयक पारित गर्छौं भन्नु अराजकता हो । सांसदहरुले यसरी बोल्नु अराजक भयो ।
