बेझाड, ११ माघ (रासस) : पाल्पाका ३० वडा सचिवविहीन बनेको छ । दुई नगरपालिका र आठ गाउँपालिका रहेको जिल्लाका १० स्थानीय तहमा ८१ वडा छन् । तीस वडामा बसेर काम गर्ने वडा सचिव नहुँदा कामकाजमा समस्या परेको सम्बन्धित स्थानीय तहका प्रमुखहरू बताउँछन् । वडा सचिवविहीन बनेका केहीमा सामाजिक परिचालक, स्वास्थ्यकर्मी र कार्यालय सहयोगीको भरमा कार्यालय सञ्चालन भइरहेको छ । रामपुर नगरपालिकाको १० मध्ये हाल छ वडामा मात्र वडा सचिव रहेका छन् । हाल वडा नं १, ३, ४, ५, ६ र ७ मा मात्र वडा सचिव छन् । वडा नं २ मा खाली भएपछि वडा नं १ का सचिव तारानाथ पोखरेलले दुई वटै वडा हेर्दै आउनुभएको छ । वडा नं ५, ६, ७, ८, ९ र १० को पञ्जीकरणको काम भने नगरपालिकाको कार्यालयबाटै हुने गरेको छ । पञ्जीकरण दर्ता वडामा हुने र प्रमाणित गर्न नगरपालिका कार्यालयमा धाउनुपर्ने हुँदा वडावासीलाई समस्या भएको छ । वडा नं ५ र ६ मा अस्थायीरूपमा कार्यरत वडा सचिव छन् । नगरपालिकाका जिन्सी शाखा प्रमुख केशवराज पौडेलले वडा नं ७ र ८ तथा प्रशासन शाखा प्रमुख डिलबहादुर भुजेलले वडा नं ९ र १० को सचिवको जिम्मेवारी पनि सम्हाल्दै आइरहेको नगरपालिकाका प्रमुख प्रशासकीय प्रमुख ज्ञानराज कोइरालाले बताउनुभयो । “कर्मचारी अभावमा दुई कर्मचारीलाई नगरपालिकाको कार्यालयका काम र चार वडाका कामको जिम्मेवारी दिइएको छ”, कोइरालाले भन्नुभयो । तानसेन नगरपालिकाका १४ वडामध्ये एउटाबाहेक सबै वडामा वडा सचिव रहेका छन् । ९ र १० वडामा एक सचिवले काम गरिरहेका छन् । माथागढी गाउँपालिकाका आठमध्ये दुई वडामा मात्र वडा सचिव छन् । हाल वडा नं ४ झडेवा र ८ को बहादुरपुरमा बाहेक अरु सबैमा वडा सचिवविहीन छ । खाली रहेका वडामा गाउँपालिकाका कर्मचारीलाई पालैपालो हप्ताको एक÷दुई दिन वडामा खटाएर काम गर्ने वातावरण मिलाएको गाउँपालिका अध्यक्ष सन्तोष थापामगर बताउनुुहुन्छ । बगनासकाली गाउँपालिकाका नौ वडामध्ये ३ नंमा बाहेक सबै वडामा वडा सचिव छन् । खाली रहेको वडाको कामकाज २ नं वडा कार्यालयका सचिवलाई जिम्मेवारी दिइएको गाउँपालिका अध्यक्ष कृष्णप्रसाद बस्यालले बताउनुभयो । त्यस्तै रम्भा गाउँपालिकाका पाँचमध्ये एक वडामा सचिव छैनन् । खाली रहेको वडा नं ५ मा ४ नं वडासचिवबाट कामकाज भइरहेको गाउँपालिका अध्यक्ष विष्णुप्रसाद भण्डारीले जानकारी दिनुभयो । पूर्वखोला गाउँपालिकाका छ वडामध्ये चार वटामा वडा सचिव छन् । चार सचिवले छ वडा हेर्ने व्यवस्था गरी वडा कार्यालयको कामकाज भइरहेको गाउँपालिका अध्यक्ष नुनबहादुर थापा बताउनुभयो । यस्तै निस्दी गाउँपालिकाका सातै वडामा सचिव नहुँदा विभिन्न शाखाका कर्मचारीले धान्दै आइरहेका छन् । वडा नं १ मा खानेपानी प्राविधिक, २, ३, ६ र ७ मा स्वास्थ्यकर्मी, ४ मा गाउँपालिकाका जिन्सी शाखाका नायब सुब्बा नोलबहादुर थापा, ५ मा वडा कार्यालय सहायक एकराज अर्यालले हेर्ने व्यवस्था मिलाइएको छ । “कर्मचारी पदपूर्ति नहुँदासम्म विभिन्न शाखाका कर्मचारी परिचालन गरेका छौँ, कामकाज रोकिएको छैन”, गाउँपालिका अध्यक्ष मुक्तबहादुर सारुले भन्नुभयो । यसैगरी रिब्दीकोट गाउँपालिकाका आठ वडामध्ये हाल चार वडामा मात्र वडा सचिव छन् । वडा नं ४ र ५ मा एक, ७ र ८ मा एक र वडा नं ६ मा तिनाऊ गाउँपालिका मस्यामका वडा सचिवले हेर्दै आएका छन् । वडा नं २ मा भने आलोपालो मिलाएर हेर्ने व्यवस्था रहेको गाउँपालिका अध्यक्ष नारायणबहादुर जिसीले बताउनुभयो । रैनादेवी छहरा गाउँपालिकाको आठमध्ये चार वडामा मात्र वडा सचिव छन् । वडा नं १ का वडासचिवले ३, वडा नं ५ वडाका सचिवले वडा नं २, ६ नं वडाका सचिवले ७ र वडा नं ८ मा गाउँपालिका कार्यालयका कर्मचारीबाटै कामकाज भइहेको अध्यक्ष रामबहादुर कार्की बताउनुहुन्छ । तिनाऊ गाउँपालिकामा छ वटै वडामा भने वडासचिव कार्यरत रहेको गाउँपालिकाका अध्यक्ष ओमबहादुर घर्ती बताउनुहुन्छ । जिल्लाका विकट र दुर्गम क्षेत्रमा घण्टौँ समय लगाएर वडा कार्यालयमा सेवा लिन पुगेका नागरिकले कर्मचारी अभावमा समस्या झेल्न बाध्य छन् । (रासस)
