विराटनगर । कम्युनिस्ट सरकारले निर्वाचनका बेला वृद्धवृद्धालाई भत्ता बढाउने भनेर दिएको आश्वासन त पूरा गरेन तर, आफ्नालाई भने दोहोरो वृद्ध भत्ता वितरण गरेको रहस्य बाहिर आएको छ ।
ज्येष्ठ नागरिकलाई कम्युनिस्ट सरकारले सम्मान स्वरुप प्रदान गरेको वृद्ध भत्तामा समेत सत्तारुढ नेपाल कम्युनिस्ट पार्टी (नेकपा)का स्थानीय नेताहरूले ¥याल चुहाएको प्रमाण भेटिएको छ ।
मोरङको उर्लाबारी नगरपालिका वडा नम्बर – ४ का नरपति भट्टराई र उनकी पत्नी पवित्रादेवी भट्टराईले सत्तारुढ दल नेकपाको सेटिङमा दुई वटा पालिकाबाट वृद्धभत्ता लिइरहेको खुलासा भएको छ ।
भट्टराई दम्पतिका छोरा चन्द्र भट्टराई गत स्थानीय निर्वाचनमा तत्कालीन एमालेको तर्फबाट उर्लाबारी नगरपालिकाको वडा नं. ५ मा वडाध्यक्षका उम्मेद्वार थिए ।
आर्थिक रुपमा सम्पन्न भए पनि भट्टराई दम्पतिले उर्लाबारीको वडा नं. ४ बाट २०७१ सालदेखि नयाँ फारम भरेर भत्ता लिइरहेको पाइएको छ ।
यसअघि उनीहरूले साविक टाँडी गाविसको वार्ड नं. ८ बाट २०६९ सालदेखि वृद्ध भत्ता लिँदै आएको रेकर्ड फेला परेको छ । टाँडी–८ राज्य पुनर्संरचनापछि मिक्लाजुङ – ३ भएको छ ।
गाउँपालिकबाट हालसम्म भट्टराई दम्पतिले बसाइसराइको कागज लिएका छैनन् । बसाइसराइ नलिएसम्म वृद्ध भत्ताको सूचीबाट उनीहरूको नाम हटाउन नमिल्ने कानूनी व्यवस्था छ ।
बसाइसराइबिना नै उर्लाबारीको साविक वडा नं. १ बाट भट्टराई दम्पतिको फारम कसरी भरियो ? वडाका कर्मचारी र वडाध्यक्ष नै बेखवर छन् ।
भट्टराई दम्पतिलाई दोहोरो भत्ता दिलाउन तत्कालीन गाविस कर्मचारी तेजनाथ घिमिरेको मुख्य हात रहेको जानकारहरू बताउँछन् ।
भट्टराई दम्पति हाल उर्लाबारी–४ का मतदाता हुन् । नेकपाका केही नेताहरूको मिलेमतो र सेटिङमा भट्टराई दम्पतिले दुई स्थानबाट वृद्धभत्ता बुझेको भट्टराई दम्पतिलाई नजिकबाट चिन्नेहरू बताउँछन् ।
मिक्लाजुङ गाउँपालिका वार्ड नं. ३ का वडाध्यक्ष खगेन्द्र मादेनले भने बसाई सराई नलगेसम्म लगत काट्न नमिल्ने बताए ।
उर्लाबारी–४ का वडाध्यक्ष लक्ष्मीनारायण धिमालले भट्टराई दम्पतिले दोहोरो वृद्धभत्ता लिएको आफूलाई जानकारी भएको बताएका छन् । उनले यथार्थ बुझेर कानूनी उपचार खोज्ने बताए ।
साइकल मन्त्रीको छवि बनाएका मोरङबाट निर्वाचित लालबाबु पण्डित अहिले संघीय मामिला तथा स्थानीय विकास मन्त्री छन् । उनैको मन्त्रालयले वृद्ध भत्ताको व्यवस्था पनि हेर्छ ।
उनकै जिल्लामा पूर्वएमालेहरूले दोहोरो रुपमा वृद्ध भत्ता लिएपछि मतदाताहरू आजित बनेका छन् ।
