काठमाडाैँ । प्रमुख प्रतिपक्षी दल नेपाली काग्रेसकी सांसद विन्दा देवी आले मगरले सत्तारुढ दल नेकपाका द्धय अध्यक्ष केपी ओली र प्रचण्डले दुई तिहाईको दम्भमा विकासका पूर्वाधारमा विनियोजित गरिएको बजेटमा प्रश्न उठाएकी छन्।
राष्ट्रियसभा सदस्य समेत रहेकी विन्दा देवी आले मगरले संसदमै चितवन र झापामा मात्रै धेरै बजेट विनियोजन कसरी भयो भनी प्रश्न समेत गरिन्। उनले बजेट विनियोजन गर्दा नेता विशेषको प्राथमिकताको प्रभावबाट मुक्त हुन सरकारको ध्यानाकर्षण समेत गराइन् ।
प्रचण्डले गृहजिल्लालाई प्राथमिकता दिएर विभिन्न योजना पारेपछि संसदमा विपक्षी दलका नेताहरुले कुरा उठाएका छन् । प्रचण्डको गृहजिल्ला चितवनमा ३६ वटा महत्वपूर्ण योजना सञ्चालनमा छन् । करिब चार अर्ब रूपैयाँका ती योजनामध्ये धेरै दाहालको निर्वाचन क्षेत्रमा छन् । दाहाल चितवन निर्वाचन क्षेत्र नम्बर ३ बाट प्रतिनिधिसभा सदस्यमा निर्वाचित भएका हुन् ।
त्यस्तै अर्का अध्यक्ष एवं प्रधानमन्त्री ओलीको गृहजिल्ला झापा र निर्वाचन क्षेत्र नम्बर ५ मा पनि यसैगरी योजना पारिएको छ । ओलीको निर्वाचन क्षेत्रसहित झापामा दर्जनौं ठूला योजना पारिएको छ ।
विपक्षी दलका नेताहरुले संसदमै ओली र प्रचण्डले आ आफ्नो जिल्लामा अर्बौको बजेट पारेको अभिब्यक्ति दिएपछि सत्तापक्षका सांसद चुप लगेका थिए। स्रोतका अनुसार बजेट विजियोजनको सवालमा सत्तापक्षका सांसदसमेत पीडित बनेपछि उनीहरु चुप लागेका थिए।
